منتدى الفرح المسيحى - انت أقوى شخص تعرفه

الحزن .. السعادة .
_ ربنا خلق الشعورين دول وهما أقوي المشاعر إللي بيترتب عليهم مشاعر تانيه ملهاش عدد ، مولودة من رحم الحياة واللي بنعيشها كل يوم.

_ الحزن : بييجي ومعاه أصحابه " الإكتئاب، الوحدة، التوتر، تقلب المزاج المُفرط، التشاؤم، العصبيه، الخنقه، الملل، التعب النفسي، الصداع، وحاجات كتير تانيه بتوصل بيك لدرجة إنك مش عارف إنت حاسس بأيه، مش عارف مالك ولا عارف تعبر عن اللي جواك، كل إللي أنت محتاجة ف الوقت ده إنك "تهرب، تعيط، تحضن شخص بعيد عنك، تفضفض، تكسر، تشتم، تزعق، تسافر، تمشي من المكان نهائي بدون رجعه" محتاج حاجة إنت مش عارفها ولو عرفها مش عارف تعملها، وده قمة الحزن والبؤس !

_ طيب تعالي أقولك أيه سبب حزنك ..
أول سبب هو بُعدك عن ربنا، مبتصليش، مبتستغفرش، مبتذكرش أسمه غير لو بالصُدفه أفتكرته، وقلبك زهد عبادته، وقلبك إتعلق بغيرة إتعلق بالأشياء المُتعبه، وإتراكم عليك ذنب صغير وذنب أكبر وذنب أضخم، خلاص فاض بيك الجبل بيزيد مش بيقل، لأ وكمان كل يوم موقف وموقف يخليك تكره نفسك أكتر.

_ طيب وتاني سبب هو ضعفك وسوء إختيارك وحب الشيء الأعمي اللي غمضلك عينك عن النور ومبقتش تشوفه غير ف الضلمة، وأدمنته وبتنكر إنك متعلق بالشيء ده رغم إنه هو نُقطه ضعفك الوحيدة.

_ طيب والسبب الأخير هو نفسك، تفكيرك السلبي ف نفسك، شكك ف نفسك، عدم وثوقك ف نفسك، كرهك ف نفسك، وخوفك حتي من نفسك، ده السبب الوحيد لضعفك ونقطه قوتك ف نفس الوقت بتكمن ف " تفكيرك ".

وبعدين هتفضل كده لحد إمتي سنة إتنين عشر سنين وف الأخر هتفضل زي ما أنت ضعيف هش كيانك أصغر من جحر نمله ، وهتفضل تشتكي مش هتبطل تعلق كل خيباتك ع شماعة الظروف والناس والدنيا والمجتمع ، وحلك بسيط مش محتاج سفر للفضاء أو حتي إنك تنتحر ..

_ ركز أكتر ف إللي جاي لو عايز تبدأ حياة جديدة.

1- صلي دلوقتي الصلاة تعود زيها زي إنك تروح مشوار كل يوم الشغل أساسي ولو يوم مرحتش الشغل هتصحي بدر زي كل يوم، هتتعود ومش هتتخلي عنها عشان بقت جزء من يومك حياتك جزء منك، صلي حب ف الله.

2- أنت أقوي شخص ف حياتك، أنت أذكي شخص عرفته وقابلته، أنت جميل بقدر ميتوصفش، أتأكد إنك قادر تعمل أي شيء ف الكون لو أنت من جواك مؤمن بذاتك الداخليه وشكلك الخارجي أنك مميز جدًا، وقتها هتقوي وعمرك ما هتضعف وهتنجح ف حياتك، وأنت شايف نفسك لسه منجحتش وعايز تنجح أكتر وهنا انت فعلًا إتغيرت للأفضل.

3- حزنك محدش هيحس بيه غيرك لو عايز تفضفض بيه أختار الشخص المناسب إللي ميكلش ولا يمل منك، أختار شخص صح تشيل من عليه همه وتشاركة ضحكته وزعله، وده بعد الشكوة لربنا والكلام معاه بكل اللي فيك إتأكد إنه سامعك ومعاك وشايلك الأفضل اللي له حكمه ف تأخير وقته للوقت المناسب.

4- إتأكد إن أكتر أشخاص بيحبوك هما أبوك وأمك وأخواتك، متكرهمش متحاولش تهرب منهم، أثبتلهم إنك صح بأفعالك مش بالكلام، وريهم قد أيه أنت إنسان ناجح شخص قوي مبيتأثرش بأي كلام مهما كان درجة سلبيته.

5- أختار صاحبك صح نقي إللي شبهك من جوا إللي مؤمنين بيك، مش اللي يزعلوا منك يعايروك، هما ده النص اﻷجمل ف الحياة أصحابك.

6- إرتباطك بقلب شخص تاني وعلاقتك معاه عايزها تنجح إبعدها تمامًا عن أي شخص يحاول إنه يحط رأيه فيها، متحكيش ع تفاصيلها، متحكمش شخص ميعرفكمش فيها، حلوا مشاكلكم مع بعض، مش قدام الناس، أختار شخص قلبه جنة أنت أدم الوحيد فيها.

7- الشغل أشتغل أي حاجة قدامك وأنت ضميرك مرتاح وإتأكد إنها مش أهانه ليك لأ دي سلمة من سلالم النجاح إللي هتوصلك ﻻعلي قمة ف حياتك يومًا ما.

8- خد قرار غلط صح أعمله متتراجعش فيه وأنت ف نص القرار لو أكتشفت إنه غلط أوعي تتراجع كمل أستمر ووقت ما هتتأكد إنك كنت صح رغم غلطك والقرار ده ساب أثر قوي ف حياتك وعاد عليك بأضعاف خلاك أقوي وأصلب خلاك شخصيه الكل بيتمني إنه يكلمك او حتي يشوفك وبس.

9- ألبس إللي أنت عايزة كل إللي نفسك فيه أخرج ف أي مكان عيش حياتك سنك أعمل أي حاجة مجنونه خارجه ع المعتاد، دي حياتك أنت وأنت الوحيد المسؤول عنها، وهتتحاسب عليها متسمحش لحد يقولك أعمل ده وده لأ عشان أنت واثق ف نفسك جدًا فوق ما إللي قدامك متخيل.

10- لما تحس بالإكتئاب، غير أفكارك فورًا أهرب من المكان اللي انت قاعد فيه لمكان فيه نور غير المزيكا ، فكر ف شيء مبهج أفتكر وأسرح ف موقف ليك مع صاحبك فيه ضحكت من قلبك أفتكر موقف تاني كنت بتضحك ضحك هستيري بدون سبب، شفايفك هتتحرك لوحدها، هتضحك وتنسي أنت كنت زعلان ليه.

_ وأخيرًا إمتي تعمل ده كله أول خطوة أقفل أي أكونت ليك ع social media لمدة يوم ف اليوم واحد بس، ف اليوم ده صلي، أقرأ، أخرج، أضحك، أتعرف ع شخص جديد، أقعد مع أهلك، أمشي مع صاحبك بين الناس، لو ع خلاف مع شخص روح صالحه، وشوف أخر اليوم أنت هتتمني إنه ميخلصش، و إطمن وخليك واثق إن اليوم ده مش هتنساه لفترة كبيرة اوى، هتنساه ف حاله وحده لما كل أيامك تكون شبه بعضها من نجاح لنجاح أكبر.

_ إما عن السعادة يا صديق فا هي شيء مش ملموس هي شيء محسوس هي الشعور بالحب اللي بيملاك، هي الفكرة الحلوة الصورة اللي مبتتعوضش، الضحكه اللي روحك من جواك بتضحكها، السعاده فكرة والأفكار خالدة مبتموتش، كل اللي عليك إنك تفكر فيها وهي هتجيلك أينما كنت هتطرد إكتئابك منك وتسكن قلبك وعقلك وتنور روحك، السعادة والحزن زى الجنة والنار وأنت ف الحالتين اللي بتختار حزنك او سعادتك بمجرد التفكير فيهم ثم أعمالك، إما عن الظروف والناس فا دول أنت أخترتهم بعقلك وأفكارك جذبتهم ليك من زمان ، وهما ساعدوك إنك تشعر وبس بالشيء وبس ، إنجوي 💙

#خليك_متفائل_لله.
#أنت_أقوي_شخص_تعرفه.
#إبدأ_دلوقت_ولو_بخطوة.