منتدى الفرح المسيحى - قللوا عدد ضحاياكم

ابقوا خدوا بالكوا من وعودكوا الخيالية ساعة الرومانسية يا جماعة.. في ناس بتاخدها بجد.

ابقوا ركّزوا في كل كلمة بتقولوها في بداية أي علاقة.. في ناس بتعلق حياتها على كلامكوا.
والناس بتصدق الكلام.. ومابتصدق تتعلق في أشّاية.. في كلمة.. في وعد يفضلوا عايشين بيه.

قلّلوا كلمة "بحبك" ومُشتقاتها لو مش قاصدينها.
وإبعدوا عن كلمة "مش هامشي".. "أنا غير الناس".. "أنا مكمّل للآخر".. "أنا هافضل موجود"، لو مش ضامنين نفسكوا وناويين تمشوا في النُص.

افهموا انكوا بشر محدودين.. مُتقلبين.. بتتعبوا من القُرب الزيادة.. وبتنفجروا من كُتر الضغط.

اعرفوا نفسكوا ومحدوديتكوا، وقلّلوا عدد ضحاياكوا.
وطّوا سقف أحلام الناس فيكوا، عشان ماتخسروهُمش في الآخر.