منتدى الفرح المسيحى - عفوا أنت مش زى ابوه

https://upload.chjoy.com/uploads/1479459739731.jpg

عّم مجدي مكين لما اتخانق مع ضابط الشرطة قاله ليه كدة انا زي ابوك وطبعا الباشا لم يعجبه الكلام وكان القبض علي مجدي ثم سحله وتعذيبه وقتله
الحقيقة يا عّم مجدي انت مش زي ابو الضابط لان الضابط ابوه لواء وعضو مجلس نواب وانت راجل غلبان ارزقي علي باب الله وكنت يوم سحلك اشتغلت من الصبح لحد الليل وجبت ١٢٠ جنيه بحالهم …تمن سجاير الباشا بس
انت مش زي ابوه لأنك معجون بالشقا وبتجري علي غلابة وهو بيجري علي حق الغلابة
انت مش زي ابوه لانك راجل راكب كارو واهو وابوه راكبين علي أبدان الناس
انت مش زي ابوه لأنك ليس لك ضهر تتسند عليه …انت راجل شقيان … بالنسبة للبلد رقم وبس …
انت نَفَر وقت الثورات
انت صوت ايام الانتخابات …
انت كيس سكر وقت الأزمات …
انت ولا حاجة بعد كدة …
بس صدقني انت أحسن من ابوه … لان الوالد معرفش يربي وطلع ضابط سادي… قاتل … مصاص دماء
وانت شهيد كلمة الحق ولقمة العيش ولأنك مصري