منتدى الفرح المسيحى - مين اللي قال كده ؟

Says who??
الجملة دي من أقوى الجمل اللي ممكن تستخدمها فحياتك! "مين اللي قال؟"
ربنا اللي قال؟
ولا العلم اللي قال؟
ولا المجتمع والناس اللي قال؟

لو ربنا اللي قال يبقى تمام "ينبغى ان يطاع الله "..
المهم تبقى متأكد إن ربنا اللي قال فعلا مش بتقلد بدون وعي وخلاص

لو العلم اللي قال فالعلم من كام سنة بس كان بيقول إن الأرض مش كروية!
وده مش معناه نبذ العلم ...... إنما معناه إن مش كل كلمة قالها العلم مسلم بيها..
كلام العلم مش مقدس!
دي نظرية قصاد نظرية فلو شاكك فى نظرية منهم ادرس وإبحث واتعلم وطلع غيرها..
الملعب مفتوح

لو المجتمع فالمجتمع ده هو أنا وانت..
وأنا وإنت دول قرروا من كام سنة بس إن البنت ملهاش حق في التعليم..
وإن السود ماينفعش لا يتجوزوا من البيض ولا يمسكوا أي منصب سياسي..
وإن الناس مش زي بعض: في عبيد وفي أحرار
ودلوقتي؟؟
البنات معاها دكتوراه ورئيس أقوى دولة في العالم كان إسود وإتلغى الرِق من أساسه
وكلامي أنا وإنت ده بقى تاريخ أسود ومحدش أصلا بيجروأ يفتح بقه في القضايا دي!
حتى على فكرة القواعد اللي محطوطة في طريقة عمل أي حاجة
(طريقة الشغل- طريقة الكتابة- طريقة الطبخ وهكذا..)
أنا وانت اللي حطينها!
وأنا وانت اللي بعد ١٠-٢٠ سنة هنحط غيرها!
فليه بنتمسك بعادات وأفكار غريبة ولا كأنها قرءان مثلا!
برضه مبقولش إنبذ المجتمع وياكش يولع! بس فلتر العادات والتقاليد والقواعد!
اللي معقول ومفيهوش ضرر ماشي واللي بيعطلك أو ملوش أي معنى ولا منطق إرميه ورا ضهرك
لأنه أساسه أراء وأحكام ناس ما أنزل الله به من سلطان وكمان ٥٠ سنة هيبقى مادة للسخرية بين الأجيال الجديدة!
فبرضه الملعب مفتوح..
إعمل انت القواعد والعادات اللي تساعدك فحياتك وشغلك وعلاقاتك وعيد تقييمها كل شوية!

يعنى من الأخر كده ركز مش تقلد كل حاجه زى الأعمى
دايماً أما حد يقولك "ماينفعش تعمل كذا كذا"
إسأله "مين اللي قال؟"