منتدى الفرح المسيحى - الى ستات_البيوت نداء ..ورجاء خاص جدا !!

الى ستات_البيوت نداء ..ورجاء خاص جدا !!
الفترة الجاية جوزك هيبقي متوتر جدا ..
هيسرح كتير ..وهيسكت كتير ،
هيبقي خايف عليكو من بكرة اوي ، والقلق هيزيد .
عشان كدة عايزة اقولك شوية حاجات تخلي بالك منها .

https://upload.chjoy.com/uploads/1478720258931.jpg

أول حاجه ..
ارجوكي بلاش السؤال دة : مالك ..مالك ... هو انت مالك ؟
عشان صدقينى صدقينى ما هيرد عليكي وهيتعصب و احتمال كبير تقلب خناقة ،
لانه بنسبة كبيرة مش عارف ماله ومش هيعرف يعبر عن اللى جواه ،
ومن الاخر حتي لو عارف مش هيحب يبان ضعيف قدامك بخوفه وقلقه دة .

تاني حاجة ..
لو ابتدي يبقي رده علي طلباتك كلام عمره ماكان بيقوله ،،
زي اية لازمتها ..مش وقته دلوقتي ،، بعدين !!
ارجوكي برضو متحسسيسهوش انه بقي بخيل ومستخسر فيكي انتي وولادك .
حاولي انتي اللي ترتبي اولوياتك وتتطلبي الضروريات .

تالت حاجه ..
لازم تعرفي ان معظم الرجالة دلوقتي بتنزل الصبح وهي مش عارفة هتروح تلاقي شغلها زي ما هو ولا لا ..
اذا كان موظف او هو صاحب العمل،،
ولو عليه اقساط وجمعيات كل شهر بجانب المصاريف الاساسية اكيد خنقته هتبقي اكتر ..
فارجوكي برضو بلاش خناقات علي حاجات متستهلش حاولي تكبرى دماغك شويتن تلاتة ..
خليكي انتي الحاجة الحلوة في يومه اللي بيستني يروح البيت عشان تخفف عنه .

واقولك بقي علي حاجة مهمة اوي ،اقعدي مع الولاد فهميهم اننا مش عايزين نضغط علي بابا و هنطلب الضروري بس .
الراجل اكتر حاجة بتوجعه انه يحس انه مش مكفي بيته ولاده عايزين حاجة ومش عارف يجيبها وبلاش يحس كمان انكم عايزين بس مش عارفين تتطلبوا ..

عدوا_المرحلة_بسلام ..
ومدام عارفين السبب دة في حد ذاته حاجة كويسة تخلينا نصبر ونفوت لبعض ومندخلش نفسنا في مشاكل اكبر واحنا مش واخدين بالنا .
انا عارفة انك هتقدري تعملي كدة واكتر كمان ، عشان انتي ياما عدتي أزمات .
طول ما ايدينا فى ايدين بعض
هتعدي_زي_ماغيرها_عدي