منتدى الفرح المسيحى - خالون من الحب

https://upload.chjoy.com/uploads/1476823726681.jpg

واحدة صاحبتي كانت حاطة الصورة دي على صفحتها النهاردة .. استوقفتني الصورة طبعاً بس التعليق اللي مكتوب عليها كان رهيب .. ده كلب من الكلاب الضالة .. حد كان ماشي فعطف عليه زي مااحنا شايفين كده .. المذهل بقى إن الكلب يشعر بالحب والعطف ده من حد غريب، فتنزل دموع من عينيه .. وباقي التعليق بيقول إذا كانت الحنية بتأثر كده في حيوان، فما بالك وقعها على الإنسان؟؟ ومكمل اللي كاتب الكلام وبيقول "اظهر حب .. ده مش هيكلفك حاجة" ..
والغريب جداً بقى اني كنت باقرا قبلها بدقايق آية مكتوبة في رومية ٢ استوقفتني بجد .. الآية مُدرِجة قلة الحنية من ضمن الخطايا اللي بيذكرها بولس الرسول .. بيقول كده: " .. بلا حُنُوًّ" .. وفي ترجمة تانية بيقول "خالون من الحنان والرحمة" .. ياه!! هي دي خطية؟؟ تتصورا اه .. دي مش بس خطية .. دي مسببة "غضب الله .."

يارب سامحني على كل موقف ماعرفتش فيه اوَّصل حنية لحد محتاج .. او اظهر حب ورحمة لشخص كان ممكن تفرق معاه .. علمني نوع حبك .. اديني حتة من قلبك .. املاني مشاعر زي مشاعرك .. مش بس لعيلتي وقرايبي واصحابي لكن كمان للغريب اللي ماعندهوش حد يطبطب عليه .. حاسة إني ساعتها هاساهم إن الدنيا تكون مكان أفضل بكتير للي عايشين فيه ..