منتدى الفرح المسيحى - اهرب_من

ال grey zone

انك تبقى فى علاقه مع واحد / واحده ..
ما تبقاش عارف انت عايز ايه و تبقى يا ساحل اللى معاك فى الموضوع يا انت اللى مسحول و مش عارف راسك من رجلك

انك بدل ما تقول لحد .. ( وحشتنى ) عشان هتتحسب عليك ..
تقوله فينك مختفى ليه والله ليك واحشه .. تبقى مبلوعه و مستخبيه ..

انك تبقى عارفه ان فيه واحد بيحبك و بيغير عليكى و عامله عبيطه بدل ما تواجهيه عشان عاجبك الاحساس اللى بتحسيه منه لأنك مفتقداه ..
و كل ما يلمحلك تعملى مش فاهمه ..
فتقولى فى نفسك هو مقالش حاجه انا ماشيه فى الصح

انك تبقى شايفها لابسه فستان حلو فى مناسبه و مستنيه منك كلمه حلوه .. فتقولها اد ايه هى حلوه و شكلها وهمى ..
عشان تشوف الفرحه اللى فى عينها و ت satisfy احتياجك للمشاعر دى ..
وتختم الجمله ب ( عُقبالك ) عشان متبقاش قلت حاجه برضه تتحسب عليك

ان الموقف عشان يبقى حلو و يعدى محتاج كلمه حلوه ..
تصرف gentle حبتين تلاته ..
او محتاج تعملى عبيطه زياده فتسمعى كلام جميل ..
و بعد ما اليوم يخلص .. تسأل نفسك .. انا دبست نفسى ولا ايه ؟!

لما تبين / او تبينى قد ايه انت مضايق انها بتكلم ناس غيرك ..
بس تبين لحد limit معين .. يبقى باين انك بتغير فهى / هو يفرح ...
بس انت مقولتش انا بغير عليكى .. بس الاحساس وصل ..
بس برضه مفيش حاجه ملموسه

و مواقف كتير جدا جدا شفتها بتتكرر مع ناس كتير
ف العلاقه بتبقى بين طرفين .. طرف عامل نفسه مبسوط ..
بالنفحات اللى بتجيله كل فتره ..
كلمه ولا فعل حلوين يصبروه على التوهان اللى هو فيه ..
او بمعنى اصح هو بنج بياخده عشان ينسى انه مش فاهم حاجه على امل ان الدنيا تتصلح
و طرف .. بيبقى زعلان من نفسه انه مبهدل اللى معاه ..
بس مبسوط من جواه انه برضه بيفرح و انه لما يقول حاجه هو بيبقى حاسسها فعلا ..

بعد شويه .. الاولانى بيمل .. و التانى بيجمد ..
الاولانى مش ملاك .. و التاني مش شيطان ..
الاتنين اختاروا ميبقوش صرحا مع نفسهم .. و الاتنين اختاروا الحل السهل

يا جماعه احنا كلنا كده .. كلنا عايزين نحس اننا مهمين ..
لما تلاقى حد بيحبك و انت مش بتحبه .. صُده .. صُديه ..
دوسوا على نفسكوا شويه ... هتبقى وحشه فى نظره انهارده بس بكره هيفهم .. هتبقى مبتحسش فى نظرها انهارده بس بكره هتقول والله ده كان محترم ومعملش حاجه تخلينى اتعشم ..
مش عشان انا محتاج احساس الاهتمام ادوس على اللى قدامى ..

لما تلاقى انك مش عارف راسك من رجلك .. اهرب .. اهرب .. اهرب
عشان اللى قدامك مش هيريحك لا انهارده ولا بكره ولا السنه الجايه .. دوس على نفسك برضه شويه..
مش عشان مستسهل الوضع دلوقتى و اسهل ليا انى افضل كده ..

العلاقه اللى مش واضحه هى علاقه بتجيبك ورا ..
و العلاقه اللى بتجيبك ورا حتى لو باينه انها حلوه ..
فهى بتضرك و بتاكل حتت من روحك كل يوم ..
اهرب_من_الgrey_zone

cpd