منتدى الفرح المسيحى - متخافش ما يقدروش عليك

https://upload.chjoy.com/uploads/1476282451831.jpg

انت عارف لما بتكون داخل على مشكلة
والخوف يبدأ يلاعب قلبك
باجى اوشوشك فى ودنك واقول لك
"ماتخافش .. مايقدروش عليك"

طب عارف لما بتحس ان زمايلك فى الشغل حاطينك فى دماغهم
وتزعل على نفسك لما تحس انك مظلوم
وتفتكر انهم هياكلوك
باجى اوشوشك فى ودنك واقول لك
"ماتخافش .. مايقدروش عليك"

هاقولك على سر .. انت يمكن مش بتشوفنى
بس اللى بيقرب منك .. باوريله انك مش لوحدك
انت اصلك مش اى حد بالنسبة لى
انت حبى الأول .. لأ انت حبيبى الوحيد
انا ماحبيتش حد قبلك
واللى عملته عشانك .. ماعملتهوش مع حد

ارفع راسك فوق .. وماتخافش
او تطاطى قدام حد .. او تفتكر ان مصيرك فى ايدين حد
اوعى تتذل لحد .. او تتمنى الرحمة من حد
اوعى تخاف من حد .. او تغير مبادئك عشان حد
وافتكر كلمتى

"فَيُحَارِبُونَكَ وَلاَ يَقْدِرُونَ عَلَيْكَ، لأَنِّي أَنَا مَعَكَ، يَقُولُ الرَّبُّ، لأُنْقِذَكَ"
(سفر إرميا 1: 18)

"ماتخافش .. مايقدروش عليك"