منتدى الفرح المسيحى - حل معظم المشاكل هو الحوار مع ولادنا

عشان نبقى عارفين إن حل معظم المشاكل هو الحوار مع ولادنا ...
بس إزاي أحاور إبني ؟! أعامله إزاي وأنا بكلمه ؟ و إزاي أخلي كلامي مؤثر فيه مش مجرد كلام ؟
فيه خطوات بسيطة جدا لو طبقناها هنوصل لنتيجة كويسة جدا
ـــــــــــــــــــــــــــــــــــــــ

أولا : التواصل قبل التوصيل ...
يعني إيه ؟ ... التواصل بمعنى ان يكون في اتصال بينك وبين إبنك قبل ما توجه الأمر أو تكلمه في الموضوع.
و التواصل يكون بـالـ eye contact ... بصله في عينه ... غير كده علمه إزاي يركز ... مثلا "سامى ، بصلي كده ؟ عاوز أقولك حاجة" ...
"دنيا ، لو سمحتي ركزي معايا" ...
وكذلك لما تسمعه حاول تخلي نفس المستوى من التواصل
ــــــــــــ

ثانيا : و دي كانت مضمنة في الجزء اللي فات ... خاطب إبنك أو بنتك بالإسم ... "ايمن ، لو سمحت" "إيمان بعد اذنك .." و هكذا
ــــــــ

ثالثا : خليك مختصر في الكلام ... بس ليه ؟!
• عشان تركز على الغرض أو الموضوع
• الكلام الكتير كل مــرة هيخلي الطفل يمل و يزهق و بعد كده هيسمع من غير تنفيذ
• الكلام الكتير ممكن يوصل لطفلك إحساس إنك مش متأكد إنت عاوز تقول إيه !
بس خليه مختصر مش مقتضب ، يعني كلماتك اللي هتشرح بيها بسيطة و الجمل بسيطة و خلي تعبيرات الوجه غير منفرة لأن الاقتضاب والكلام بالأوامر مش مفيد للطفل .
ـــــــــــ

رابعا : خليك بسيط .
استخدم جمل قصيرة ، كلمات مفهومة وبسيطة ،
والأهم "إسمع ابنك بيتواصل ازاي مع اللي حواليه و سجل ملاحظاتك"
و لما تحس إنه مبقاش مركز معاك أو مش مهتم و بيبص بعيد إعرف انه مش فاهم إنت عاوز إيه ؟
ــــــــــ

خامسا : خليه يردد تاني إنت طلبت منه إيه؟
ولو معرفش يبقى مفهمش لأنك اتكلمت كتير يا إما الموضوع معقد بالنسبة ليه
ـــــــــ

سادسا: قدمله عرض ميقدرش يرفضه ...
و ده خصوصا مع الأطفال من سن سنتين لـ 3 سنين ...
زي "البس هدومك عشان ننزل نشتري اللعبة اللي انت عاوزها" ...
"كلي أكلك كله عشان نتفرج عالكرتون سوا" ...
لكن الأهم اللي هتوعده بيه ... لااااازم تنفذه ، عشان ابنك ميفقدش الثقة فيك
ــــــــــ

سابعا و أخيرا : خليك إيجابي :
متقولش "بطل جري و اقعد" ... لأ ،
قول "في البيت احنا بنمشي ، بره في الشارع نجري !! صح؟" ...
النهي المباشر مش دايما فعال
ـــــــــ