منتدى الفرح المسيحى - بحلم بعالم متلون...

بحلم بعالم موازي ..
_ محدش فيه بيجرح حد .. و الحب عليه سايد .. الناس بتقابل بعض بابتسامه .. و بتسلم علي بعض بالاحضان .. احضان مفيهاش شهوه
عالم مفيهوش فراق .. ولا بعد
_ بحلم بعالم متلون .. البحر فيه معمول من شكولاته .. و الارض كلها ورد احمر ..
الشمس مبتأذيش .. والسما بتمطر بلالين
_ بحلم بعالم مفيهوش حروب ولا قتل .. كل البلاد واحده .. ومفيش جيوش وحدود
مرسوم ع الاعلام قلب .. و خالي من الدم
_بحلم بعالم بسيط .. البنت فيه تمشي ف الشارع من غير ماتخاف .. ولو حبت متخبيش
لو رفضت عريس متقدم ليها اهلها ميدبحوهاش .. ولو عشقت بني ادم تطلب ايده من اهله .. و تتقدمله هي عادي
_بحالم بعالم جميل .. البنت فيه بتركب عجل .. و بتلبس فساتين
محدش بيجرحها بنظره .. ولا يوجعها بكلام
_ بحلم بعالم الجواز فيه من غير ورق .. يكفي كلمة بحبك .. الحب اكبر عقد .. واعظم ضمان
_ بحلم بعالم مجنون .. مفيهوش دهب وفلوس .. كل حاجه ببلاش والنفوس عفيفه ..
الجناين كلها فواكه .. والشجر بيطرح يوماتي .. ومحدش بيبات جعان
_ بحلم بعالم طفولي .. الاطفال جواه مبتكبرش .. والبراءه ف كل مكان
ممنوع فيه الحزن .. والفرحه بتدوم
_ بحلم بعالم راقي .. متعلق ف الشوارع لوحات ل بيكاسو ودافنشي .. وف البلكونات عصافير .. وع الشبابيك ياسمين وفل
كل الافلام فيه ل سعاد حسني .. وكل الاغاني ل فيروز
بحلم ب دنيا غير الدنيا ..
بحلم ب حياه
مجرد حياه !
"مينا مجدي