منتدى الفرح المسيحى - الحب والسوشيال ميديا

مش معني أنك في علاقة عاطفية ما ,
انك لازم تفضل تتصور كتير او تتكلم كتير بخصوص مشاعرك ..
مش لازم تعرف كل الناس انك سعيد و فرحان بالعلاقة ديه ..
يكفي ان اطراف العلاقة حاسين بكدة , فهو ده مغزي العلاقة ..

الـ Public display of affection الـ PDA أو ( تعبير علني عن المشاعر) ,
و هو مصطلح بيتكلم عن ظاهرة منتشرة مؤخرا و هي أن اي couple جديد بيبتدي يمارس مشاعره بشكل علني و مفرط بين الناس,
و من اكتر الحاجات اللي ساهمت في وجود الـ PDA هي الـ Social media
فبمجرد دخول اي شخص في اي علاقة بيبتدي يتعامل مع العلاقة ديه بشكل تجاري اكتر منه بشكل شخصي ,
فيبقي الهدف مش ازاي احافظ علي استمراريتها , علي قد ما ازاي اعرف اسوقها او احافظ علي بريقها و سحرها قدام الناس !؟

سنة 2014 اتنشر علي موقع sciencedirect.com دراسة بتتكلم عن ان ازاي الـ couples اللي بتميل أكتر للكلام الكتير علي علاقتها بين الناس و اقحامهم بشكل مباشر او حتي غير مباشر في خصوصيتهم بيكونوا في اعماقهم بيعانوا من قلق او توتر شديد في علاقتهم ديه,
فبيستخدموا البهرجة و الشو الكتير حوالين علاقتهم عشان يخفوا توترهم و عدم أرتياحهم ده ..!

فالهدف مش اننا منشاركش الناس فرحتنا , بس ميبقاش هدفنا الوحيد هو أننا نشاركهم بس فرحتنا !!
أنما كل ما العلاقة حظت بمقدار أعمق من الخصوصية و الهدوء , كل ما قدروا اطرفها يستمتعوا بيها اكتر ,
كل ما قدروا يفهموا بعض من غير عبء كلام حد او نظرة حد ..
كل ما قدروا يعيشوا في جوهم الخاص بحرية و سلام ..

فالعلاقة القوية مش مستنية تشجيع من حد عشان تستمر ,
مش مستنية أضواء و دوشة عشان تبثت قوتها ,
مش مستنية تبرهن لحد قد ايه هي علاقة حلوة و سعيدة ..
فالعلاقة الحقيقية مش مستنية حاجة من الأساس ..!

كلمات كيرلس بهجت