منتدى الفرح المسيحى

-والله يا عمي أنا ليا الشرف إني قابلت حضرتك انهاردة :D
*شوف يا برنس.. فكنا بقى من الهري و شغل الإنترفيوهات ده.. نخش عـ المفيد
-هههههه.. برنس؟ و الله يا عمي انت عسل.. خش عـ المفيد
*بقى يا نجم أنا مربي عروسة تتكلف وزنها لامؤخذاة دهب.. شعرها لوحده مكلفني 60 ألف جنيه إلى الآن
-احم.. مش فاهم يا عمي!
*زي ما سمعت كده.. شعرها مكلفني شامبوهات و بلسم و ماسكات و فيتامينات و خميرة و كرياتين و أعشاب و حنة و كوافيرات و مكاوي و سشوارات حوالي 60 ألف جنية
-مش عارف أقولك ايه يا عمي الصراحة!
*استنى بس.. عندك بقى الشاسيه.. اللي هو هيكلها العظمي يعني.. مكلفني من و هي لسه ف بطن امها.. سونار بقى و أشعة تلفزيونية و كالسيوم و كميات لبن لا حصر لها.. و بعد ما اتولدت خد عندك فيتامين د و بيض و أجبان و.. و.. كل ده عشان أربي شاسيه جامد يستحمل بهدلة الزمن و خلفة العيال و تربيتهم و الموصلات و القذارة دي.. حاجة كده ألماني!
-مش شايف يعني يا عمي انك بتتكلم عنها يعني بطريقة كده يعني مـ......
*و لسه يا حبيبي و لسه.. عندك بقى كريمات بشرة و صابون حساس و واقيات شمس و سكراب (صنفرة يعني).. ده غير مكياجات و أورجانك بروداكتس و شاور جيل و بودرة تلك و عسل و زبادي و خيار.. الخيار لوحده كلفني 4000 جنيه!!
-طب يا عمي انا مش جاي أشتري عر........
*و التعليم... كله كوم و التعليم كوم... يعني مش اهتمام بالجتة بس.. اهتميت بالعقل كمان.. و كتب و روايات و مسرحيات و أوبرا.. تصدق إني كنت باخدها أمسيات شعرية و الأوبرا؟
-ليه يا عمي يعني؟
*عشان ذوقها يبقى راقي يا بني آدم.. شوف ده صرف كام!
-يعني يا عمي التقييم بالفلـ........
*ده غير بقى الغريزة.. غريزة الأب.. الحب اللي مش بإيدي و اللي مسيرك هتفهمه في يوم من الأيام..
-أنا الحقيقة مش عارف حضرتك قولتلي المقدمة الطويلة العريضة دي ليه!! عشان الشبكة يعني و القايمة و المؤخر و كده؟
*حمار
-أفندم؟!!
*بقولك حمار.. بعد كل اللي انا عملته ده و صرفته ده، مش هاخد منك و لا مليم!
-طب و الشبكة؟
*ما يهمنيش.. زي ما انت عايز
-و القايمة
*صفر.. مش عايزها
-و المؤخر؟
*اتنين جنيه..
-أمال انت عايز ايه يا عمي؟
*في حالة إنك ظلمتها أو ضربتها أو عملت معاها أي حركة قذرة من بتوع الرجالة، هستخدم معاك ورقة واحدة بس عايزك تمضيلي عليها دلوقتي..
-ورقة إيه؟
*"أقر انا الموقع أدناه فلان الفلاني أني انتحرت بحقنة هواء و انا بكامل قواي العقلية. و هذا قراري بعد أن سئمت الدنيا و ما فيها. و أرجو من الله المغفرة و من أهلي أن يسامحوني"!!
- best dad ever ✋🏼