صعبان عليا منك...
 

https://upload.chjoy.com/uploads/1456520783591.jpg


صعبان عليا منك يارب
دانا عمرى ما بخل بيه عليك
بس كان عشمى زى اى أب
أخده فى حضنى قبل ما تاخده ليك
ما هو انت فى الأصل اديتهونى
يعنى بس هو كان عندى ضيف
بس غصب عنى اتعلقت بيه
ويا حبه عينى كان ضيف خفيف
طب كنت قوللى أنه مش هيطول
كنت حتى عملت حسابى
او اخدت بالى من الأول
وما خليتوش أغلى احبابى
بس اقولك انت برضه كريم
ورتنى معاه احلى ايام
ولا عمره كان شقى ولا لئيم
وكان كلامه أحلى كلام
كان نفسى يكبر قدام عينى
ولا يتغرب عشان القرش
غصب عنى ما كانش بايدى
انى اقوله خليك ما تسافرش
بس اهو سافر عشانى واللى ليه
امه وأخواته وصبيه كان بيحبها
عشان يحقق إللى حلم بيه
أنها تملأ قلبه ويسكن قلبها
بس خلاص الواد غاب وراح
ولا عدت هاقوله انا مستنيك
سافر وسابنا كلنا فى جراح
ومن بره بره خد طريقه ليك
انا عارف انه دلوقتي عندك
واكيد مبسوط باللى هو فيه
بس عشمى يارب فى جنيه قلبك
قلبى هيقف هاموت عليه
اقولك على إللى واجعنى كمان
لما شوفته على البحر لابس.خفيف
رن صوته الصغير فى الودان
مش هتودينى يابا البحر فى الصيف
ايدك روحت يا عنينن ابوك
بس من غير ما تاخدنى معاك
ولاهان عليهم حتى يدفوك
قال ايه واقفين يتصوروا معاك
وقال ايه رافعين سلاحهم عليك
فاكرينك جبان هتخاف زى العيال
ما يعرفوش انى يوم ما لمست ايديك
قلت لهم ولدى دا سيد الرجال
قتلوك وانت قدامهم أسد
قاعد بتدعى للى خلقهم وخلقك
فكرتني بيوم ما قالولى دا ولد
ربنا يخلى ولا عمره يفارقك
بس ايدك سبتنى يابن ابوك
ولا فرق معاك حالى انا وأمك
وياريتهم قتلوك ورجعوك
كنت أبوس رأسك واضمك
يارب انا قلبى على ولدى موجوع
شحتنى بس صبر على صبرى
مش ها قولك ليه طولت فى عمرى
ها قولك أنه من يوم ما سافر
واحشنى صوته ما بعرفش انام
رجايا فيك تلبى لى طلبى
اشوفه حتى لو فى المنام