منتدى الفرح المسيحى - حوار مع الحبيب

في مرة بسأل ابويا بقوله ايه هدفك مني
جه في رؤية ان كان او حلم او خيال يطمني
ويقوللي فكر شوية هتعرف جواب سؤالك
وافتح كتاب الحياة هتلقي جواب لحالك
فتحت كتابي بدموع وخشوع وصلاة
وقلت له كلمني بكتابك ياااالله
ولقيت الصفحات من الهوا بترفرف شوية شوية
قريت عن مريم وبطرس ويوحنا وغيرهم والسامرية
ونمت وتاني يوم خدني الكتاب لرحلة تانية
وبعد ما خلصت قراية لقيت افكاري حانية
شاكر ابويا لاجل حنانه جه واتنازل رد عليا
وكتبت ابيات شعري في رضا عن حياتي
وقلت تعالي اعمل فيا لمجد اسمك يوماتي
وعلشان عرفتني هدفك انا هبدأ اكتب ابياتي

هدفك هو اني اكون جنبك
في الابدية افرح بوجهك
واتهلل لما ادوق حبك
في نوال البركة السماوية

هدفك اني انول الخلاص
اعيش في قلبك بإخلاص
واسلم حياتي وخلاص
برضا وقناعة وحرية

هدفك اني احس مشاعرك
واسكب الطيب علي شعرك
وازيد من ثمار زرعك
وكرمك يصبح ايقونة حية

هدفك اكون صورة منك
يحكوا ويتحاكوا عنك
في صورة عبدك وابنك
اللي صار ابن المسيا

هدفك اني اعيش فرحان
واتقدم لعرشك في ايمان
وبثقة من غير خوف والام
وساعتها هشوفك بعنيا

علمني احقق هدفك
واكون دايما في صفك
واعيش جوة مدينتك
لحد ما تنادي عليا