منتدى الفرح المسيحى - لما تكون خاطب

لما تكون خاطب وتقابل في حياتك زميلة ليك وتتكلم وتضحك معاها .. جايز تلاقي حصلك انجذاب ليها علي الرغم انك بتحب خطيبتك
الإنجذاب ده بيكون من الشيطان تحت شعار الممنوع مرغوب وعلشان هي مش ليك ولا هتكون ليك ... فبتحس معاها بالإحساس ده
وجايز السكينة تسرقك معاها اكتر وتكلمها برومانسية وتلاقي منها ردود تشجعك علي الإستمرار فتسيب حبيبتك لأي سبب وتحت اي ظرف
بحجة انكم مش متفاهمين او بحجة ان عندك ظروف هتأجل الموضوع شوية او بخلافه من الحجج اللي ساعتها عقلك بيكون مجهزها ....

جايز تسيب خطيبتك وبعد ماتسيبها تحس ان زميلتك دمها بقي تقيل .. مع ان دمها مبقاش تقيل ولا حاجه لكن لما بقت متاحه ليك انك تخطبها نظرية الممنوع مرغوب مبقاش ليها لزمة في حالتك دي ... وبالتالي بتصرف نظر عنها وتندم علي اللي عملته

وجايز تسيب خطيبتك وتخطب دي واللي عملته مع خطيبتك تعمله مع دي ..

ونادر اوي لو كملت فعلا معاها ..

اللي انا اعرفه حاجه .. لو مفيش تفاهم مابينكم كنت هتسيبها من قبل مايظهر حد جديد في حياتك

لكن لما تفكر انك تسيبها وكل الكراكيب دي تتكون مرة واحده لمجرد انك لقيت حد يضحكلك .. فثق ان ده شعور شيطاني هدفة التخريب والتدمير

فكر كويس جدا ومتخليش مشاعرك وعواطفك تضحك عليك ..

والعكس صحيح .. لو بنت قابلت حد جديد هيخليها تسيب خطيبها ... تقرا الموضوع وتطبقه علي نفسها

دايما قول يارب باركلي حياتي وتمم ليا علي خير وابعد حروب ابليس عني ... وخليني انا وحبيبتي نتمسك ببعض مهما كانت المغريات

مجرد رأي قد تفق معي وقد تختلف .. واحترم جميع الأراء

by : مايكل سامى