انا مين في عنيك يارب ؟؟


انا ابنك .. عايش جنبك .. انا ملكك .. عايش فيك .. انا غصنك .. مغروس جواك
ولا تراب الخطية غمرني وحرمني منك .. ولا قش غروري اتحرق ودخن ومبقتش شايفك

انا مين في عنيك يارب؟؟
انا في قلبك .. طب انت في قلبي .. انا في فكرك .. وانت في فكري ..انا عندك ولا انا منك
ولا انا تينة مفهاش ثمر تستاهل اللعنة .. ولا انا ارض صلبه مش قابلة الكلمة ..

انا مين في عنيك يارب؟؟
انا تحت رجلك .. انا بمجد اسمك .. انا بشكرك على كرمك .. انا تحت رجلين بنتك وابنك
ولا انا حربه ضربت جنبك .. ولا انا شوكة انغرست في رأسك .. ولا انا مسمار اندق في إيديك ورجلك ..

انا مين في عنيك يارب؟؟
انا واقف قدامك .. ولا بجري بعيد عنك .. ولا بجري فيك .. ولا بجري وراك ..
انا في كورة الأغراب .. انا بتخانق مع الخنازير ع الخرنوب .. انا عايش هناك في ارض الخراب

انا مين في عنيك يارب؟؟
انا فحمة ملآنه بنارك ونورك لكل الناس .. ولا انا فحمة انطفت وبقت رماد .. انا صخرة تبني عليها وتأسس .. ولا انا رمل مينفعش اساس .. انا خادم ولا مخدوم .. انا حبيبك تقول انا الهه زي ماقولت انا اله ابراهيم واسحاق ويعقوب .. ولا انا البحر غمرني ومعرفتش ارجع واتوب

انا مين في عنيك يارب؟؟
انا حبة قمح مش قابله ترتوي بيك .. ولا لسه حاطط فيا امل ارتوي واروي محبيك .. انا فارغ ولا انا مليان .. ولا انا مليش في الدنيا مكان .. انا فخار محتاج يتجدد .. ولا انا صخر محتاج يتفتت ..

انا مين في عنيك يارب؟؟
انا ابن الهلاك .. ولا انا اللي تقوله نعما" ياعبد اسعدت مولاك .. انا منتصر فيك .. ولا مغلوب من عدوك .. انا بعيش ولا بموت .. ولا ميت والأسم عايش .. انا شايب في محبتك .. ولا طفل في حبك .. ولا شاب في قوتك ..

انا مين في عنيك يارب؟؟
انا حشرة .. انا دودة .. انا قصبه مرضوضه .. ولا انا جبار بأس .. ولا انا فيك اتجدد كالنسر .. ولا انا شجرة مليانة اثمار .. انا بير .. انا بير يشيل كلمتك جواه .. انا بير يشبع بكلمتك اللي معاه .. انا حبة ملح بيها تملح .. ولا انا فاسد زي شوية تراب

ولا انا غير كل ده؟؟
انا مين في عنيك يارب؟؟