منتدى الفرح المسيحى - يا ولاد بلدى يا مصريين

يا ولاد بلدى يا مصريين

https://images.chjoy.com//uploads/im...ac1b51a919.jpg

ايه اللى جرى لكم يا ولاد بلدى يامصريين ‏
من أمتى كنا بنقول دول أقباط و دول مسلمين
لازم تعرفوا إننا فى هذه الأرض شريكين
لسه الجرح بينزف من حادثة كنيسة القديسين
فصدمنا من حرق و هدم كنيسة الشهيدين
فكروا شوية و أعرفوا مين هما المستفيدين
دلوقتى ضربوا الأقباط بالسلفيين
و بعد كده هنلاقى خلاف بين شيعه و سنيين
أفيقوا إحنا بقينا من كل جانب بالصراعات متحاصرين
فى الشرق صراع تحرير الأرض بين الفلسطينين واليهود المحتلين
و فى الغرب ليبيا على وشك غزو من أمريكان و أوربيين
بسبب ما يفعله القذافى كبير المجانين
مع أحفاد عمر المختار الثوريين
و فى الجنوب قسموا السودان بين شماليين و جنوبيين
و شوفوا مين بيحرض علينا دول حوض النيل الأفريقيين
بقوا يقولوا إحنا من مياه النيل مش مستفيدين
هنبنى سدود على النيل علشان للميه إحنا عايزين
و معاهدة المياه القديمة إحنا بيها مش معترفين
هذا هو الخطر الحقيقى شوفوا جاى لنا منين
مبقاش ينفع يطلع قسيس و شيخ إيديهم متشابكين
و يقولوا إحنا إخوة و جيران متحبين
ويقولوا عندنا مفيش فتنة بين مسلمين و مسيحيين
لحد إمتى هندفن راسنا زى النعامة فى الطين
عايزين خطاب دينى مختلف من رجال الدين
و يكون الهدف واحد للآئمة و القسيسين
الهدف زرع الحب بين كل المصريين
تحركوا يا حكماء مصر ويا مثقفين
المشكلة مش فى إعادة بناء كنيسة الشهيدين
المشكلة فى نفوس الشباب المحتقنين
عايزين علاج بجد علشان كشح تانية مش عايزين
يارب بارك بلادى و أحرسها من أعدائنا الملاعين
و أن يعم السلام و الحب بين كل المصريين

من كلماتى

http://i145.photobucket.com/albums/r...y-5d00a665.gif

هذه القصيدة من كتاباتى السابقة
بعد حادث حرق كنيسة وهدم كنيسة أطفيح
وكانت موجودة فى المنتدى
قبل حدوث المشكلة للمنتدى
فى شهر مايو 1012