منتدى الفرح المسيحى - مستنيك يارب وواثق في طرقك

مستنيك يارب وواثق في طرقك..
مستني اللحظة اللي تيجي فيها في الهزيع الرابع..
اللحظة اللي الكل يفتكر إن الفرص خلصت والنجاة مستحيلة.
. وتيجي انت بقوتك اللي مابتهزش.. تعلن حضورك..
وتحوّل الخوف لأمان.. وتسكّت الموج بكلمة..

مستنيك تيجي في وقتك..
الوقت اللي بيكون أدق من دقة الثواني..
الوقت اللي مايعرفوش غير قلبك..
أنا واثق إن مجيئك المتأخر في عين الناس..
هو معاده المصبوط في عينك..

ظهورك في الهزيع الرابع مش بس إنقاذ.. ده إعلان حب..
إعلان إنك ما نسيتش.. وإنك شايف.
. وإنك قريب أكتر من كل الزعيق اللي جوا قلبي.