منتدى الفرح المسيحى - الراحة المتعبه بكرة تتحول لشقى يٌجبر الخاطر

سواق تاكسي اتصل ببنته وقالها صليلي
ربنا يكرمني بزباين تقصدني في سفريات طويله
علشان اعرف اكسب قرش
الزحمه متعبه وبتضيع الوقت وبتهلك العربيه وفلوسها قليله

تاني يوم جاتله سفريه لاسكندريه
الراجل استغرب
بعدها سفريه لمطروح
الراجل اندهش
بعدها سفريه للسويس
الراجل كان هايتجنن
بعدها سفرية للغردقه

اول مارجع القاهره
جري على بيته ومعاه قرشين حلوين
خد بنته في حضنه وقالها
متصليش لمدة يومين ، محتاج اخد نفسي واريح شويه انا والعربيه

قالتله ماتزعلش مني يابابا انا اصلا نسيت اصلي

قالها ازاي الكلام ده ، امال الرزق اللي انا فيه ده منين !
قالتله مش عارفه

بعدها بيوم تليفونه رن لحد محتاج يسافر الصعيد
وبيقوله قادر توديني المنيا ولا محتاج تريح شويه !
قاله ايه ده ! انت عرفت منين اني محتاج ارتاح

قاله اكيد من بعد مابنتك صليتلك وانت مش ملاحق على الشغل
قاله ايه ده ، انت عرفت منين موضوع بنتي
وبعدين دي اصلاً نسيت تصلي !
قاله وماله ، بس ربنا مانسيش

انا سمعتك وانا راكب معاك من عشر ايام
وانت بتكلم بنتك وبتطلب منها تصليلك
ولفت انتباهي رقم تليفونك اللي كاتبه على العربيه من ورا
نزلته في بوست على النت للي عايز يسافر مع شخص امين

يمكن صلاة بنتك مالحقتش توصل
، بس وجعك واصل لربك من غير ماتتكلم
بيا او من غيري هايتدخل
اللي انت شايله جواك ، واصل
واللي قاهرك ، ربك حاسس بيه
تبقى بتدور على رزقك من طريق
، وتلاقي ربك مدبرلك رزقك من طريق تاني خالص
تبقى قاصد حد يساعدك وتلاقي الفرج جه عن طريق
حد تاني ماتعرفوش
لما رزقك يتأخر تاني اعرف انه بيحوشهولك
والراحة المتعبه بكرة تتحول لشقى يٌجبر الخاطر
الله كريم ❤️