زوادة اليوم:
حطّ المحبّة بقلوب الناس
https://upload.chjoy.com/uploads/17616300953041.jpg
بيخبرو عن رِجّال مات ونتيجة أعمالو الأرضيِّة فات ع الملكوت، وكان هالرِجّال يحبّ الشغل كتير، بيروح لعند القدّيس بطرس وبيقلّو :

«بترجّاك بدّي شي شغل إشتغلو».

قَلّو القدّيس بطرس :

«بَدّي مِنَّك تروح تبلِّط المُحيط الهادي».

راح هالرجّال وبعد 1000 سنة رجع وقَلّو :

«نفَّذت طلبك شو بدَّك تعطيني شغل جديد؟»

قَلّو :

«بَدّي ياك تروح تغَطّي جبال هملايا بالطِين».

راح وبعد 5000 سنة رجع وقَلّو :

«عملت المطلوب مِنّي، وهلَّق شو بدَّك ياني أعمل؟»

سكت القدّيس بطرس، وفكَّر، وقَلّو :

«بدّي ياك تروح تزرع المحبِّة بقلوب كِلّ البشر».... ومن وقتها راح هالرجّال ولليوم بعدو ما رِجِع!

الزوّادة بتقلّي وبتقلَّك :

«المحبِّة بذرة، من واجِبنا نزرعها بقلوبنا، نسهر ونهتَمّ فيها، وما نخَلّي الأشواك تخنقها». والله معك.