منتدى الفرح المسيحى - الخذلان في التأخير وجع مختلف

عارف الإحساس ده؟
لما تكون مستني حد بعينه وقت وجعك..
مستنيه ييجي..يقول كلمة يطبطب يقولك إنك مش لوحدك..
وتفضل مستنى..
مستنى..
مستنى..
وهو مش بييجي..
الوجع يعدي الجرح يلتئم بالعافية تقوم على رجلك تاني..
وساعتها فجأة.....هو يظهر..
جاي ومعاه كل الكلام اللي كنت محتاجه
..بس خلاص مابقاش له طعم..

الخذلان في التأخير وجع مختلف..
مش لأن الشخص وحش بس لأن اللحظة راحت..
واللي بيرجع بعد فوات الأوان بيلاقيك اتعلمت تمسك نفسك لوحدك..
بس برضه جواك وجع صغير من اللي ماجاش في ميعاده..

طب نعمل إيه لما ده يحصل؟
ماتكتمش الوجع وماتقلبوش غضب..
اعترف لنفسك: "أنا كنت محتاجه ومجاش وده وجعني."
بس كمان ماتقفلش الباب..
لأن الغفران مش دايمًا مكافأة للي غلط..
الأهم..الغفران هدية لنفسك..
عشان تقدر تعيش من غير ما تفضل محبوس في لحظة التأخير..

في ناس مش هتعرف تيجي في وقتها المظبوط..
بس ربنا عمره ما اتأخر حتى لما جه بعد أربعة أيام..قام لعازر..