منتدى الفرح المسيحى - علشان كل اللي يشوفني يشوفك

انت صالح يا رب..
صالح فوق كل ضعف فيا..
وفوق كل مرة أنكرتك فيها بعجزي أو بخوفي..
شكراً على صلاحك اللي عمره ما اتبدل..
وعلى أمانتك اللي بتفضل سابتة حتى وأنا بتلخبط.
عارف يا رب.. مشكلتي مش في ضعف الإيمان
.. مشكلتي إني ساعات بحاول أعيش من غير لمستك، فبضيع.

لكن لمستك كفيلة ترجع كل حاجة..
لمسة تشفي كسري.. وتصحّي روحي من النوم..
وتطهر قلبي اللي تعب من الدواير.
أنا جعان لحضورك.. عطشان لنورك..
نفسي أرجع أعيش في حضنك تاني
وأحس بالسلام اللي ملوش شبه.

قالتلي كلمتك “تكفيك نعمتي لأن قوتي في الضعف تكمل”..
وأنا جاي أقولك: ده أنا ضعفي نفسه بينادي على قوتك..
ثبتني فيك.. قويني من جوه.
. خليني أعيش بالنعمة مش بالمجهود..

رجّع النور اللي جوايا..
وابهر العالم بحضورك في حياتي..
علشان كل اللي يشوفني يشوفك.