منتدى الفرح المسيحى - الخدمة الحقيقية مش إنك تخدم الناس بس

خليك_خادم_واعى
أوقات بننسى إن الخدمة مش اتجاه واحد..
الخادم بيدّى ويسمع ويجاوب..
لكن محدش بيسأل: مين اللي بيخدم الخادم؟

الخادم مش آلة موجودة عشان تشتغل طول الوقت..
الخادم مش وظيفة كنسية..
الخادم هو إنسان ربنا بيكمّل بيه محبته للعالم..
الخدمة مش المفروض تسرق علاقة الخادم بالله
..المفروض تغذيها..

الخادم محتاج يتخدم..
محتاج اللي يسمعه من غير ما يحاسبه..
محتاج اللي يصلي له مش بس يصلى معاه..
محتاج اللي يفكره إن ربنا بيحبه حتى في اللحظات اللي ما عندوش فيها حاجة يقدمها..

أوقات الخادم بيبقى زي شمعة بتنور لكل الناس..
بس محدش فكر مين هيولّعها من جديد لما تخلص..
وده مش ضعف بنحاول نسلط الضوء عليه..
ده وعي بحاجة ضرورية تبقى دايمًا قدام عنيك..
لأن الخادم الواعي فاهم إن الروح اللي بيخدم بيها مش منه..دي عطية محتاجة تتجدد..

الخدمة الحقيقية مش إنك "تخدم الناس بس"..
لكن إنك تفضل تسمح لربنا "يخدمك من جوه"..
يطهّرك ويصلّح دوافعك ويريّحك..
عشان لما تروح تخدم تدي من فيض مش من فراغ..