منتدى الفرح المسيحى - ارحمهم يا رب لأن مفيش حد شايف كسرتهم غيرك

يا رب.. في ناس عايشة حياتها جوه سجن مش معمول من حيطان.
. لكن من وجع بيقرص قلبهم كل يوم..
ومن لوم بيجلد ضميرهم من غير رحمة..
ومن دموع محبوسة عمرها ما لقت اللي يمسحها.
في ناس بتنام وهي موجوعة من نفسها..
وتصحى تلاقي وجعها لسه صاحي معاها..
محشورين بين زعل على اللي فات.. وبين حزن من اللي ضاع..
وبين لوم متكرر على اللي عملوه أو حتى على اللي ما قدروش يعملوه.
ارحمهم يا رب.. لأن مفيش حد شايف كسرتهم غيرك..
ولا سامع أنينهم غيرك.. ولا حاسس بتعبهم غيرك.
إدخل أعماقهم واطفي نار الندم اللي بتاكلهم من جوه..
إدخل حياتهم وغير صورتهم عن نفسهم.. عرّفهم إنك شايفهم غاليين جدًا..
وإن اللي بيكسروا في نفسهم هم مش بيشوفوا جمالك اللي جوه قلوبهم.
إدينا يا رب نشوف ذاتنا بعيونك.. مش بعيون الخيبة ولا الفشل..
ادينا سلام يملأ الأماكن اللي كنا بنجلد فيها روحنا..
واملأ حياتنا برجاء جديد ينهضنا من تاني..
علشان نصدق إنك بتحبنا زي ما إحنا.. وإنك بتقدر تخلق من هشاشتنا قوة
. ومن ضعفنا نصرة.. ومن دموعنا فرح حقيقي.