منتدى الفرح المسيحى - انت ربنا رزقك بالفلوس وانا ربنا رزقنى بالأمانه

انت ربنا رزقك بالفلوس وانا ربنا رزقنى بالأمانه

انهرده الصبح كنت قاعد فى وش المحل ، لاقيت تكتك وقف ونزل واحد وفضلوا يتخانقوا مع بعض على الحساب ، الراجل عاوز يدفع ٥ والسواق بيقوله المشوار ب٧ وانت جاى من اخر البلد يعنى المفروض ١٠..
الراجل منشف دماغه ومش عاوز يدفع غير ال٥ لدرجة انه رمى الفلوس فى وش الراجل ومشى دخل بيتهم..
السواق راجل كبير فى السن وباين عليه انه طيب ومالوش فى المشاكل ، ياعينى خد الخمسه من الأرض لما وقعت وقال حسبى الله ونعم الوكيل وضرب كف على كف ومشى وهو مهموم قوى ، كان باين جامد على وشه ..
بعدها بحوالى عشر دقايق لاقيت الراكب اللى كان بيتخانق وقف قدام المحل وعمّال يوقف اى تكتك ويتكلم معاه ..
روحتله قولتله فى حاجه معاك ؟؟
قالى كنت راكب تكتك ونسيت فيه دوسيه فى اوراق مهمه جداً صعب أطلع غيرها …
قولتله الراجل اللى انت اتخانقت معاه ورميت الفلوس فى وشه ومشيت ؟؟
بص ليا وسكت ..
الغريب بقى فى الموضوع ان ربع ساعه بالظبط ، لاقيت تكتك وقف قدامنا ونزل منه الراجل ومعاه الدوسيه وبيسأل على الراجل ..
الأعجب من ده كله ، ان الراجل طلعله ٢٠٠ جنيه مكافأه ، لكن سواق التكتك رفض وقاله كلمه عجبتنى جداً لدرجة انها بترن فى ودانى لغاية دلوقتى ..
" انت ربنا رزقك بالفلوس وانا ربنا رزقنى بالأمانه "