منتدى الفرح المسيحى - القرار الصح معناه إنك بتتحرك لقدام بدل ما تفضل واقف فى مكانك

– ناكل فين النهاردة؟
= معرفش اختار أنت..
– طب كورس كذا ولا كذا؟
= مش قادر أقرر خايف أختار الغلط..

زمان كان القرار الصعب هو الجامعة أو الشغل أو الجواز..
دلوقتي بقينا بنخاف نقرر في تفاصيل صغيرة جدًا زى ناكل فين..نلبس إيه..نختار كورس أونلاين..
ليه؟ عشان عصرنا بقى مليان اختيارات بشكل مرعب:
كل حاجة ليها ١٠٠ بديل وكل اختيار بيتصور إنه "مصيري"..

لكن الحقيقة إن مش كل قرار محتاج ياخد حجم أكبر من حجمه..
قرارك في اختيار مطعم مش هيغيّر مستقبلك..
لكن خوفك المستمر من إنك "تختار غلط"
هو اللي ممكن يعطلك عن أي خطوة..

اللي يساعدك تتعافى من الخوف ده هو التمرين:
جرّب تاخد قرارات صغيرة بسرعة
وتقبل نتيجتها حتى لو مطلعتش أحسن حاجة..
عادي..اتعلم وكمّل..
القرار الصح مش معناه إنه مفيهوش غلطة..
القرار الصح معناه إنك بتتحرك لقدام بدل
ما تفضل واقف فى مكانك..