منتدى الفرح المسيحى - كان ممكن أوي ينزل من السما على كرسي منور وكبير

https://upload.chjoy.com/uploads/167942320912511.jpg

كان ممكن أوي ينزل من السما على كرسي منور وكبير
وملايكه يمين وملايكه شمال ونجوم بتدور وحمام بيطير
وسحابه كبيرة تليق بملك تاخده توصله
على قصر دهب وسرير مفروش بحرير

كان ممكن أي سيناريو عظيم جدا يحصل عادي
غير انه يكون نايم على قش في عز الليل بردان
وألف مكان غير المزود يبقى جاهز له وفاضي
ويكون له خدم وحشم ويكون له حرس صاحي وسهران

بس يسوع ما اهتمش بالعظمه
ضحى وقدم رحمة وحب مش معقول
قبل يسوع كانت السما خاصمتنا
بعد يسوع صالحتنا والباب ما بقاش مقفول

كان ممكن وقت ميلاده يكون معروف للكل في كل مكان
والسما تبعت دعوات للناس بميعد واضح وبعنوان
وملوك العالم ييجوا ويسجدوا
والأرض بحالها تكون متزينه بالنور والألوان

كان ممكن يوصل على حفله كبيره تليق بمقامه
ويلاقي يفط ويلاقي أعلام اسمه عليها مكتوب
ما كانتش الأبواب اتقفلت كده كلها قدامه
ده وصل على رفض وعلى تهديد بالموت وسفر وهروب

بس يسوع رغم الرفض اختارنا
وباركنا وحررنا ودخلنا عهد جديد
هو يسوع المولود لخلاصنا
هو اللي رفع راسنا وادانا فرحة وعيد