منتدى الفرح المسيحى - الرفض بيعمل جرح بس محبته بتدي هوية

الرفض وجع حقيقي…
يمكن من صحاب، من أهل، أو حتى من نفسك.
أوقات بتحس إنك مش مرغوب، أو إن وجودك مالوش قيمة.
لكن وسط كل ده، فيه صوت مختلف بيهمس:
"محبة أبدية أحببتك".
يعني مش حب مؤقت، مش حب مشروط،
مش حب يتغير مع الظروف.
ده حب سابقك من قبل ما تتولد،
حب يستمر بعد كل سقوط، حب مش هيتسحب منك أبدًا.
الناس ممكن ترفضك لو مشيت عكس توقعاتهم…
لكن هو بيحضنك حتى وإنت واقف عكسه.
ممكن يتقال عليك "أنت مش كفاية"،
لكن في عينيه إنت محبوب، غالي، ومقبول.
الرفض بيعمل جرح، بس محبته بتدي هوية.
لما تعرف إنك محبوب من الله بمحبة أبدية،
مش هتعيش تلهث ورا رضا الناس…
هتعيش من منطلق إنك مقبول أصلًا.
فالمرة الجاية اللي تحس فيها إنك مرفوض…
افتكر إن في إله أعلنها بصوت عالي:
"أنا بحبك… وهفضل أحبك للأبد." ❤️