منتدى الفرح المسيحى - كفاية عليكم الدنيا

كفاية عليكم الدنيا

سيبناها لكم مخضرة .. افرحوا بيها و اشبعوا بخيرها ..

سيبناها لكم تشبعوا بيها ، و نتمنى انكم تتهنوا ..
بس عمرها ما دامت لحد ،
و لا حد اتهنى باللى خده غصب و ظلم و قسوة و عافية ..
اظلموا ، و افتروا .
. دوسوا علي الحق زى ما انتم عاوزين
، و عيشوا لكم يومين فاكرين انكم كسبتوها ..
و ح تخلص ايامكم بالطول أو بالعرض ..
و تحت التراب ح تناموا فى انتظار العدل من إله العدل ..
محكمة السما الأخيرة لسه ما جاش معادها .
. و كل اللي عملته من شر أو شر كنت مسميه خير
، مكتوب بالحرف و بالنقطة..

كمل ظلم ، و نيم ضميرك و سد ودانك براحتك ..
سببتم المرار للناس ، و استضعفتم اللي سامحكم،
و افتكرتوا انها خلصت على كده ، و الستارة لسه ما نزلتش ..

و بعد ما حاولنا بكل الطرق نزق الظلم بعيد ،
ما عندناش غير الرضا و الصبر و الشكر ،
و انتظار تعويضات ربنا تكفينا و تعزينا و تراضينا ..

.. د.مجدى إسحق