منتدى الفرح المسيحى - الآيه دي باب كبير قوي بيعلمنا الرجاء

https://upload.chjoy.com/uploads/171719104200131.jpg
في آيه صغيرة حفظتها انا وصغير كانت بتقول :
"اِنْتِظَارًا انْتَظَرْتُ الرَّبَّ، فَمَالَ إِلَيَّ وَسَمِعَ صُرَاخِي،"
تقريباً دي أول آيه أحفظها ف حياتي، كانت مكتوبه على صورة متعلقه ع الحيط
الصورة دي كانت لـ طفل شبهي حاطط أيده على خده وبيبكي ..
كنت ببص على الولد واسرح، وأقرا الكلام المكتوب وانا بنطق اغلب الكلام غلط وبتهته
وأنا مش فاهم حاجة خالص
بس كنت كل ما أبقى زعلان من حاجة أبُص في الصورة دي
وكإني بشارك الولد اللي ف الصورة حُزنُه ..
كبرت شويه وإبتديت أربُط الآيه دي بالزعل واليأس والبُكا
وإني المفروض أقولها أما أكون مِتضايق زي الولد اللي ف الصورة ..
لكن أما كبرت ووعيت
إتضحلي إن الآيه دي باب كبير قوي بيعلمنا الرجاء
وإن مهما الصورة إسودت والامور إتلخبطت والألم زاد
لازم ربنا يسمع صراخي ويستجيب
( إنتظاراً ) اهو الانتظار ده قد اي بقى ؟
كتير؟ قليل ؟ .. معنديش فكرة ..
يوم ولا سنة ؟ معرفش !
ف الحالتين هفضل مستني عشان متأكد من النُص التاني للآيه
إن ربنا مهما إتأخر، هيسمعني وهينقذني مادام أنا بصرخ له❤️🙏🏻
"اِنْتِظَارًا انْتَظَرْتُ الرَّبَّ، فَمَالَ إِلَيَّ وَسَمِعَ صُرَاخِي،" (مز 40: 1).