منتدى الفرح المسيحى - اصحوا وفوقوا لاننا بنعامل نفوس مش بنعامل حيطان

كلمتين اتمني تقروهم
+++++++++++++
في ناس اللي بتشوف كل حاجه بعين فيها أدانه ونصبوا نفسهم قضاه
وعمالين طول الوقت يحكموا علي تصرفاتك
وعاملين فيها ملايكه بجناحات كده
واكنهم هما بيقدموا كل الروحيات
وخايفين اوي علي ولادنا وهما كل طريقتهم وكلامهم
وسلامهم ونظراتهم كلها التواء ورياء وأدانه
والمشكله انهم فاكرين انهم مش باينين وان اللي قدامهم مش فاهم لكن الحقيقه هما ظاهرين جدا واللي قدامهم بس بيحاول مايحرجهمش
لقيت مره حد بيقولي ايه لازمه تكلم كل شويه عن النفسيه
وبتربط كل حاجه بربنا
سيبك من قصه (تخفيف أحمال ) والكلام ده
فحبيت اكتب كلام عام و نفسي اقول كلمتين مهمين
بص بعينك اللي عماله تدين في ده وده وبص شويه علي العالم
بص علي كم الظلم والحقد والقهر اللي الناس عايشه بيه
بص علي كم الضغط النفسي وحالات الاكتئاب والانتحار والموت المفاجئ بسبب قهره القلب
بص علي كم الضغوط اللي بيعانوا منها شباب وصغيرين وعواجيز
اذاي عاوز الناس تحب ربنا بنفوس مريضه وحزينه ومكسوره ومعثره ومش لايقه كلمه حق تتقال وسط ألمها
اوعظ واتكلم وعلم بس اشفي النفس الاول
يا فرحتي بخادم ولا أنا ككاهن وعظت عن المحبه وفي نفس قصادي قلبها مقسوم نصين من قله الحب اللي شافوا في حياته
يا فرحتي لو أنا خادم ولا انا ككاهن
اتكلم عن الابوه وانا في البيت ابويا بيهين فيا وبيدوس عليا
يا فرحتي لو أنا خادم ولا انا ككاهن
اتكلم عن جمال الكنيسه وانا من جوه مش بحضنهم من قلبي
يا فرحتي لو اتكلمت علي كل حاجه وانا شايف نفوس مدمره
يمكن أنا مش لاهوتي زي حضرتك
يمكن مش شاطر في العقيده زي حضرتك
يمكن مش شاطر في الألحان والوعظ زي حضرتك
بس يكفيني اني بحس وبشعر وبتألم مع المتألمين
يكفيني ان لسه جوايا مشاعر تحس بالموجوع
ساعتها يقدر يسمع ويتوب ويقرا ويعيش كل الروحيات بنفس سليمه
اصحوا وفوقوا لاننا بنعامل نفوس مش بنعامل حيطان

ابونا جوناثان رفعت