منتدى الفرح المسيحى - الحنية الحقيقة ما بتتولدش من آلة

https://upload.chjoy.com/uploads/175196634767921.jpg

هو الموضوع بقى مريب فعلًا…

ناس كتير بقت تتكلم مع شات GPT كأنه صاحبهم
بتحكيله عن يومهم
بتفضفض له
بتسأله أسئلة وجودية
وبتطلب منه يطبطب ويطمن

وبعيدًا عن أي هزار…
الموضوع فعلاً خطير

ليه؟
لأنك لما تدي مساحة التعبير
والفضفضة دي لآلة، حتى لو بتفهمك كويس،
بتاخد من روحك الإنسانية تدريجيًا
بالرغم من انك بتتعوّد على علاقة “مضمونة”،
“من غير صِدام”، “من غير مجازفة”،
لكن كمان دي علاقة من غير دفء
من غير حضن
من غير عين حقيقية تقولك “أنا حاسس بيك”

أنا مش ضد استخدام التكنولوجيا
لكن ضد استبدال الإنسان بالآلة
ضد إننا نلجأ للذكاء الاصطناعي لأننا فقدنا الأمل في التواصل مع بشر حقيقيين

الراحة اللي بنلاقيها هنا
ممكن تبقى زي المخدرات
تطمنك لحظة
وتعزل قلبك لسنين

جرب تحكي لبني آدم
جرب تقرب من حد
حتى لو اتأذيت قبل كده
لأنك اتخلقت للعلاقات
مش للتفاعل مع شاشات

الذكاء الاصطناعي مش هياخد مكان إنسان حقيقي بيحبك بجد
ولا هيسد فراغ حضن
ولا هيسمعك وانت ساكت.

خليك واعي
وافتكر:
الحنية الحقيقة ما بتتولدش من آلة
لكن من قلب حي… لسه بيتعلّم يحب رغم الوجع