منتدى الفرح المسيحى - أنا جاي ليك زي ما أنا بس أرجوك متسيبنيش زي ما أنا

https://upload.chjoy.com/uploads/171213323945061.jpg

عزيزي الله،
أنا مش بطلب حياة سهلة،
بطلب قلب يفضل ماسك فيك
حتى لما كل حاجة حواليا تقع.
علّمني أحتمل اللي إنت شايف إنه ليَّ،
حتى لو أنا مش فاهم ليه.
علّمني أفضل أكلمك وأنا ساكت،
وأشوفك وأنا مغمض،
وأصدقك حتى لو الإحساس اتكسر.
أنا مش عايز المسافة اللي بينا تكبر كل مرة أتوجع،
عايز كل وجع يقربني ليك أكتر،
مش عايز أزهق من الصلاة،
ولا أزهق من الانتظار،
ولا أزهق من الإيمان.
خلينا نفضل صحاب،
خليني ابنك .. حبيبك ..
طفلك اللي بيعرف يرجع لحضنك حتى وهو معكوك،
حتى وهو مش لاقي كلام،
متأكد إنك الوحيد اللي بيحتوي القلب من غير ما يحكم عليه.
أنا جاي ليك،
زي ما أنا،
بس أرجوك متسيبنيش زي ما أنا.