منتدى الفرح المسيحى - رجّعني زي زمان

https://upload.chjoy.com/uploads/174214236774671.jpg

يا يسوع،
أنا فاكر الأيام اللي كنت فيها قريب منك،
قلبي كان بيولع لما بسمع كلمتك،
وصوتك كان واضح جوايا...
فاكر إزاي كنت بصلي ودموعي بتنزل من غير ما حد يلمسني.

بس دلوقتي…
في حاجة حصلت…
قلبي بَرِد، ومحبتك ما بقيتش الأولى،
وبقيت بعمل حاجات كتير… بس قلبي مش شغّال.

إنت بتقوللي:
"فاذكر من أين سقطت وتُب…"
يعني أفتكر أنا كنت فين… وإزاي بعدت…
وتوب… وارجع تاني لحضنك،
وارجع أعمل الأعمال الأولى…
اللي كانت طالعة من حب مش من عادة.

يا رب،
رجّعني زي زمان… بل أحسن من زمان،
خليني أشتاقلك تاني، وأحبك من كل قلبي،
وأعيش ليك مش كواجب… لكن كعاشق.

ساعدني أرجع،
وما تسمحش إني أفضل واقع في نفس السقطة،
خد بإيدي،
ونقيني،
وافتكرني برحمتك.

آمين.