منتدى الفرح المسيحى - لو عايزة بيتك يدوم خليه دايمًا مبني على التفاهم مش التحدي

احذري تكوني "عنيدة" في بيتك… العناد مش قوة، العناد ممكن يهدم كل حاجة!

الست اللي بتفتكر إن التمسك برأيها في كل حاجة هو ذكاء… في الحقيقة بتخسر كتير من غير ما تحس.

▪️ العناد مش بطولة
البيت مش معركة، ومش كل حاجة لازم تكون بالنِّد.
العند بيولّد عناد قدامه، واللي بيحبك النهارده ممكن يبعد عنك بكرة بسبب إصرارك الدائم على إنك "صح وهو غلط".

▪️ الست العنيدة ممكن تخسر قلب جزها قبل ما تكسب أي نقاش
الرجالة بطبعهم بيرتاحوا للست اللينة، اللي بتعرف تتفاهم، مش اللي صوتها عالي ونبرتها دايمًا حادة.
ولو حس إن كل كلمة بيقولها لازم يتخانق عشان يقنعك بيها… هيزهق.

▪️ اللي عندها عقل… تعرف إمتى تتكلم وإمتى تسكت
مش كل موقف محتاج رد، أوقات كتير الحكمة إنك تسكتي لحد العاصفة ما تهدى، وده مش ضعف، ده وعي.

▪️ العند الزايد بيخلّي الحياة مش مستحملة
الزوج بيبقى طيب وحنين وبيستحمل، بس لو لقى قدامه حائط صد طول الوقت… هيجي وقت ويمشي، حتى لو خلفتي منه عشر عيال. الصبر له آخر.

▪️ التفاهم مش بيعني إنك أقل منه
المودة محتاجة مرونة، والمشاركة مش معناها إنك دايمًا تتحدي… لكن إنك تعرفي تمشي الأمور بحب واحترام.

▪️ أغلب مشاكل البيوت بتبدأ بكلمة "أنا مش هسكت!"
لكن الست اللي عندها حكمة… بتعرف تختار إمتى تتكلم، وإمتى تمشي الحكاية بالهدوء.

▪️ كرامتك مش في العند… كرامتك في أسلوبك
كوني قوية بس من غير ما تكسري، وكوني واضحة بس من غير ما تكوني حادة.

---

رسالة لكل بنت: لو عايزة بيتك يدوم، خليه دايمًا مبني على التفاهم مش التحدي… على الاحتواء مش العند.

وصدقيني، الراجل اللي يحبك بجد، يستاهل منك إنك تكوني ليّنة مش متصلبة، حنونة مش عنيدة.