منتدى الفرح المسيحى - زوادة اليوم: الألف والياء 2024/12/3

زوادة اليوم:
الألف والياء
https://upload.chjoy.com/uploads/173303340639171.jpg
بيخبّرو عن بَيّ بيِملُك مكتبة ضخمة جدًّا فيها من أكبر الموسوعات وأهمّها.

بيوم من الإيّام، بيوقف إبنو الصغير قدّام إحدى الموسوعات الأميريكيِّة بمُجلَّداتها الضخمة وبيسأل بيّو :

«مِن وين جاب كتّاب هالكتب الحروف لحتَّى مَلّو كلّ هالمُجلّدات»؟

ابتسم البَيّ لإبنو وقَلّو :

«كِلّ المُجلّدات ما بتحتوي إلّا ٢٦ حرف إنكليزي، بهالعدد من الحروف سجَّل لإلنا البحّاثة كلّ هالموسوعة القيِّمة».

أصيب الإبن بدهشة لا توصَف، وكان عَم بيردِّد : «٢٦ حرف»!!!

بيقطع البيّ دهشة الإبن وبيقلّو :

«سِجِل الحياة أكبر بكتير من هالموسوعة، كلّو أسماء مكتوبة بحرفَين هنّي الألف والياء، لأنّو يسوع قال عن ذاتو أنا الألف والياء».

الزوّادة بتقلّي وبتقلَّك :

المسيح هوّي باب الحظيرة يلّي من خلالو الخراف بتدخل للملكوت، هوّي الألف والياء يلّي من خلالو كلّ أسماءنا تُكتَب بسفر الملكوت، والله معك.