منتدى الفرح المسيحى - المُهم لما تدخل إمتحان التجربة تبقي حكيم وشاطر

https://upload.chjoy.com/uploads/16162609997871.png

النهاردة .. أحد "التجربة"
ومفيش حد فينا مَدخلش في تجربة صعبة
، وتجربة وجَعت قلبه وشَغلت تفكيره .!

لأن الحياة كُلها تجارب وصعوبات ومشاكل
وكثيرة هي تجارب إبليس .!

وخلي بالك ..
الله غَيْرُ مُجَرَّبٍ بِالشُّرُورِ، وَهُوَ لاَ يُجَرِّبُ أَحَدًا
يعني ربنا مش هو اللي وقعك في تجربتك
ربنا كل مشيئته خير .. لكن اوقات بيسمح بالتجربة
ومع كُل تجربة ليها الرد بتاعها ..
وليها المُعزي، وليها الحل، وليها سلاحها !

المُهم وانت في عِز تجربتك، إفتكر الآية دي:
"لأَنَّهُ فِي مَا هُوَ قَدْ تَأَلَّمَ مُجَرَّبًا يَقْدِرُ أَنْ يُعِينَ الْمُجَرَّبِينَ."

ودة معناه ان ربنا شايف وعارف وحاسس بيك
لأنه مجرّب الوجع ومجرّب البُكا ..
اوعي تفتكر انه ناسيك في عِز تجربتك .
. لا طبعًا .. هو بس باله طويل وبيرتب الخطة علشان ينقذك وتخرج أقوي وأفضل من الأول !

المُهم لما تدخل إمتحان التجربة، تبقي حكيم وشاطر
وميضِّحكش عليك من إبليس
لأن ياما ناس غرِّتها الفلوس والمناصب ..
وياما ناس حسّت بالأنا والغرور ومشيت في الكدب
وياما ناس مشيت ورا الشيطان وعملت "بلاوي"
وياما ناس دخلت تجارب وفشلت انها تطلع منها سليمة .!

3 جُمل مُهمين جدًا قالهم ربنّا في يوم التجربة :
• ليس بالخبز وحده يحيا الإنسان ، بل بكل كلمة تخرج من فم الله
• لا تجرب الرب إلهك
• اذهب يا شيطان لأنه مكتوب : للرب إلهك تسجد وإياه وحده تعبد

هنا نصلي لـ ربنا في كل تجربة
إنقذنا - يارب - من تجارب فوق إحتمالنا
وفوق طاقتنا وفوق استيعابنا
نجينا يارب من خطط إبليس الشريرة
وأعوانه اللي عايشين ع الارض 🙏
-