منتدى الفرح المسيحى - كلمتين كده عشان حالات الأنفصال والمشاكل اللي زادت

https://upload.chjoy.com/uploads/1502605638251.jpg

كلمتين كده عشان حالات الأنفصال والمشاكل اللي زادت اوي اوي و اللي اغلبها سببها الاهل بأخطاء في التربيه او في التصرفات ..

_ عزيزي الاب لما تشوف ابنك بييجي على مراته و بيظلمها قدامك متعملش نفسك من بنها و انت فنفسك بتقول ايوه كده راجل ..
دي مش رجوله ده نتيجة فشلك في تربيته و غالبا شافك بتظلم امه مئات المرات و ورث عنك المرض ده ..

_ عزيزتي الام لما بنتك تظلم مرات ابنك و انتي تنصريها و تقفى معاها ده مش معناها انك بتحبيها ..
ده معناها انك ربيتي كائن حقود شرير مؤذي و لسه بتكبري فيه و بتعينيه عالظلم و تأكدي ان اللي هتعمليه فبنت الناس هتشوفيه فبنتك ..

_ اعزائي اهل الزوجه .. مهيش شطاره انكم تقووا بنتكم على زوجها في كل صغيره و كبيره ..
علموها تحل مشاكلها و تحفظ سر بيتها من غير ما تيجي على كرامتها ولا تخرب حياتها ..
علموها ان انتوا هتقدموا المشوره لو احتاجتها ولكن الاصل في كل الامور انها تشاور زوجها ويبقى ليهم عقليه مكمله لبعضها ..

_ اعزائي اهل الزوج .. انتوا اللي رحتوا برجليكوا تخطبوا البنت من اهلها ..
كانت قاعده فبيت ابوها ملكه متنعمه في عز اهلها مش ناقصها حاجه ..
مجريتش وراكوا ولا اجبرتكوا فمفيش داعي لشغل ماري منيب و تقعدوا بقى تكيدوا و تقرفوا فيها ..
لو متمسكين بابنكوا اوي كده خلوه قاعد جمبكوا زي الفازه كده لا السجل المدني هيحاسبكوا على قعدته ولا الدوله هتدفعكوا غرامه ..
و فكرة ان البنت دي بعبع هيخطف ابنكوا و و تخليه يقسى عليكم و شغل افلام الابيض و اسود دي ..
ده بيعني انك شاكه فتربيتك لابنك .. لانك لو ربيتي صح عمره ما هيبطل يبرك ..

ربوا ولادكوا و بناتكوا تربيه صح
علموهم اسس اختيار شريك العمر و انها مش دبلتين وصور حلوه وهيصه و شوية كحك وبسكوت عشان نقفل بؤ طنط شفاعه اللي كل شويه تقول " انتى لسه متخطبتيش " ..
افهموا و ادركوا ان قمة سعادتكوا و نجاحكوا هي استقرارهم و فرحتهم و اعتمادهم على نفسهم ..

ابنك او بنتك مش هيتخطفوا من حضنك ..
دول بيكبروا دايرة الحب و الدفا اللي انتوا محتاجين انها تكبر اكتر منهم اصلا ..
كفايه تربيه سامه و مفاهيم مغلوطه و تدخل ملوش داعي و ظلم و افساد و مكائد ..
بدل ما تيجوا فالاخر و تندموا انهم هربوا من ظلمكم و بعدوا عنكم عشان يقدروا يعيشوا في سعاده
او قاعدين جمبكم بعد ما خربتوا بيوتهم و كل قلوبهم سخط عليكم لانكم كنتوا السبب