منتدى الفرح المسيحى

منتدى الفرح المسيحى (https://www.chjoy.com/vb/index.php)
-   أخبار موقع ومنتدى الفرح المسيحى (https://www.chjoy.com/vb/forumdisplay.php?f=169)
-   -   قصة كفاح | نشأة منتدى الفرح المسيحى (https://www.chjoy.com/vb/showthread.php?t=571773)

Ramez5 18 - 07 - 2018 06:06 PM

قصة كفاح | نشأة منتدى الفرح المسيحى
 
قصة نشأة الفرح المسيحى


قصة كفاح
نشأة منتدى الفرح المسيحى

واجه منتدانا الغالى الكثير من التحديات
حتى أصبح صرح كبير بمحبتكم وعطائكم وصلواتكم

وسوف يكون هذا الموضوع عن سرد خطوات الانشاء
وأهم التحديات بالتفصيل وكيفية التغلب عليها
ذكريات الاعضاء وخبراتهم المكتسبة
مواقف حدثت مع الخدام وكيفية التغلب عليها واجتيازها
عوامل نجاح الخدمة والنهوض بها لتليق بأسم يسوع
عمل رب المجد فى الخدمة مع مواقف ملموسة لذلك

سنحكى لكم كل شئ بالتفصيل الى حتى ما وصلنا اليه
وبعد ذلك سوف يتم فتح الموضوع لمشاركة جميع الأعضاء
أدمنز ، أدارة عامة ، الأشراف العام ، الخدام والخادمات ، الأعضاء ..
لنسطر مواقفنا جميعاً مع ..:: الفرح المسيحى ::.. :)

Ramez5 18 - 07 - 2018 06:29 PM

رد: قصة كفاح | نشأة منتدى الفرح المسيحى
 
يوم 15 سبتمبر عام 2009 م ولد منتدى الفرح المسيحى
وهنبداء مع بعض تفاصيل ولادة منتدانا الغالى :)

رسالة المسيحية هى رسالة فرح وسط العالم
لأن من ثمار الروح القدس ( محبة ، فرح ، سلام ... )

فكرت ازاى نقدم رسالة فرح هدفها
أفرحوا فى الرب كل حين (في 4:4)

ان ازاى الناس تعرف ربنا أكتر وتفرح به
ازاى نخلى فرح ربنا فى قلوب كل الناس
الكتاب المقدس بشارة مفرحة ولازم تصل رسالته لجميع البشر

من هنا تم اختيار أسم المنتدى ( الفرح المسيحى Christian joy )
Ch Joy :)
مكانش فارق معايا أى تكلفة نهائى
لكن الفكرة ان لازم ننجح وتصل رسالة الفرح لكل العالم
وبالفعل تم بذلك مجهود لأنشاء المنتدى وظهر يوم 15 / 9 / 2009
ومن هنا أنطلق أسم جديد ومميز فى عالم المنتديات المسيحية
يتبع

Ramez5 18 - 07 - 2018 06:54 PM

رد: قصة كفاح | نشأة منتدى الفرح المسيحى
 
تم انشاء أعلانات ممولة بكثافة فى المنتديات المسيحية وأعلانات أدسنس تظهر للجميع
كذلك فى بعض الصحف الأسبوعية مثل أخترنا لك وعلى مدار الوقت تم طبع مطبوعات متنوعه
تحمل أسم ولينك المنتدى ، كذلك تم طبع كتيبات لبعض القديسين بتصميم من مصممى الفرح المسيحى
مع عمل أعلانات متواصلة على مواقع التواصل الأجتماعى من وقت لأخر ...
وكان للأعضاء مواقف لا تنسى فى نشر لينك المنتدى فى جميع المنتديات المسيحية
وكانت يد الله تعمل ...

وبداء جميع الأعضاء ( أدمنز وخدام وخادمات وأعضاء ..... ) فى تكثيف المنتدى بالمواضيع المميزة
كان النجاح ملحوظ جداً على مستوى جميع المنتديات والفضل أولاً لرب المجد يسوع
الذى نشر الخدمة من خلال ضعفنا جميعاً
وثانياً من تواصل الجميع على مدار اليوم بالكامل فى تقديم كل ماهو جديد ومميز
تصميمات ، صور ، أشعار ، فيديوهات ، أخبار ، مواضيع ... فكان لنا الحصريات دائماً

وفى وقت لم نتوقعه تألق المنتدى
ولكن من هنا بداء التحديات ..
يتبع

Ramez5 18 - 07 - 2018 08:12 PM

رد: قصة كفاح | نشأة منتدى الفرح المسيحى
 
كان التحدى الأكبر أن يستمر النجاح
وسط مجموعة مميزة من اروع الخدام والخادمات من جميع أنحاء العالم
تألق الفرح المسيحى وتميز فكان كل من يسمع عنا ينضم إلينا

ولكن بدأ الحرب من مواقع مسيحية ضدنا بعدة طرق وبأساليب مختلفة
فعدو الخير لم يقف مكتوف الايدى ..
فشهروا بمنتدانا بأنه ينشر اشياء مغلوطة وجنسية
ومنهم كان يسرق تعب ومجهود الاعضاء
ولكن كانت يد الله تعمل معنا ضد هذا الشر
فبدأ الاعضاء الخروج من منتداهم والانضمام معنا ..
كذلك من منتديات اخرى غير مسيحية
محاولة التحاور فى الأديان .. ولكن ليس هذا هدف المنتدى
حروب كثيرة مرت بنا ولكن يد الله كانت تعمل معنا
حتى ان وصل الأمر بتلف سيرفر الموقع وبدأنا ونهضنا من جديد
محاولة اختراق الموقع بكل الطرق ولكنها لم تؤثر فى استمرار الخدمة
كان الحب المتبادل بين جميع الاعضاء يفوق اى توقع
واستمر نجاح الخدمة والمنتدى كل يوم فى تألق ملحوظ
ولكن بدأ مواقع التواصل الاجتماعي تؤثر على المنتدى
يتبع

Ramez5 18 - 07 - 2018 08:22 PM

رد: قصة كفاح | نشأة منتدى الفرح المسيحى
 
وسط ظهور مواقع التواصل الاجتماعي تويتر والفيس بوك
وتفاعل الدخول من أجهزة الموبايل الحديثة
أصبحت معظم المنتديات المسيحية فارغة
لأن بنسبة كبيرة يدخلون من الموبايل
وأصبحت هذة المنتديات لا تتوافق مع أجهزة الموبايل الحديثة
فكان علينا أن نجعل المنتدى يتوافق مع كل جديد وحديث
وتطور المنتدى ليناسب جميع المتصفحات بجميع أنواعها و أحجامها
واصبح منتدى الفرح المسيحى يتوافق مع الموبايل والجوال وجميع انواع الأجهزة
لذلك دائما نسعى إلى التطوير الذى يتوافق مع متطلبات العصر
لكى يستمر النجاح والتألق لمنتدانا الغالي الذي يليق به
ويكون متوافق مع الجميع فى أى وقت ..
يتبع

Ramez5 19 - 07 - 2018 06:38 AM

رد: قصة كفاح | نشأة منتدى الفرح المسيحى
 
أبدع وتألق كل من ساهم وشارك فى المنتدى
وتعرفنا وانضم معنا أعضاء من جميع أنحاء العالم
ولنا أن نفتخر بهم جميعاً لأنهم يتركون أثر جميل من ابداعهم
وبكم دائماً يرتقى ويتقدم منتدى الفرح المسيحى :)

sama smsma 19 - 07 - 2018 01:00 PM

رد: قصة كفاح | نشأة منتدى الفرح المسيحى
 

بدايتى مع الفرح المسيحى

كانت اول ما بعتلى رامز ادخل المنتدى عام 2009
كان وقتها المنتدى جديد لسة فى اوله
وكنا كلنا حماس نبنى اسرة جميلة متفاعلة تخدم اسم ربنا
كان فى حاجات مميزة ومختلفة وحصرية كتيرة

مش مجرد اننا ننقل اى مواضيع من منتديات تانية وخلاص
كنا بنهتم نقدم كل جديد وحصرى اكتر
مواضيع جميلة قدمها الخدام والخادمات بكل حب وتعب
وكان فى مواهب بتكتب مواضيع وعظات وتأملات
وترانيم وتصميمات مخصوص باسم المنتدى
وكان فى حفلات بتتعمل

وتصميمات لكل عضو هدية
ومسابقات وهدايا بتتوزع كتير
وبنقضى احلى الاوقات مع بعض

وقت ما المنتدى وقع بسبب عدو الخير

كان فى صراع مع الوقت وسهر طول الليل
علشان يقف تانى المنتدى ويرجع زى الاول واحسن كمان
بمساعدة ايد ربنا لينا بقي احلى منتدى
و بتعب وبمساعدة وبمشاركة كل الاعضاء فيه

كمان المنتدى فيه اقسام مختلفة تناسب كل الناس
واحلى بركة بمنتدى الفرح المسيحى وجود اباء كهنة ورهبان وسطينا
بركتهم مفرحانا دايما
ماتعرفوش أد ايه كمان حاجة تفرح لما بنشوف اسم المنتدى
على اى صورة
ونشوفها منتشرة فى مواقع اجنبية او على مواقع التواصل
شكرا رامز على احلى منتدى جمعتنا فيه
وشكرا لكل اعضاء الفرح المسيحى

ولكل شخص بيهتم بالخدمة فيه بكل محبة
شكرا على وجودكم بالفرح المسيحى
واشكر ربنا على وجودى وسطيكم
بحبكم اوووووووى





Mary Naeem 19 - 07 - 2018 01:35 PM

رد: قصة كفاح | نشأة منتدى الفرح المسيحى
 
بدايتي مع الفرح
كانت كلها فرح
عرفته بعد ما فتح بفترة صغيرة
عن طريق اعلان في منتدى اخر
دخلت عليه وجدت فيه حب بين الاعضاء مشفتهوش في أي مكان
نقول فعلا كنيسة صغيرة
لقت اجماع ان المكان دا يكبر
مكنش في فرق بين اصغر عضو والأدمن بتاع المنتدى
فعلا الحب أساس الفرح المسيحي
وكانت اصعب فترة مرة عليه في المنتدى
لما المنتدى وقع بسبب عدو الخير
وكل المواضيع اختفت
طبعا كان ساعتها حسيت بيأس فظيع
بس بالمحبة اللي بنا اتجمعنا تاني واشتغلنا شغل من نار
لغاية لما المنتدى رجع احسن من الأول
دي بركة ربنا انه يحافظ عليه
شكرا لكل واحد ساهم بأي حاجة بسيطة في المنتدى

walaa farouk 19 - 07 - 2018 05:29 PM

رد: قصة كفاح | نشأة منتدى الفرح المسيحى
 
بدايتى مع الفرح المسيحى

كانت عن طريق دعوة رامز ليا ..

طبعا معرفتى بمنتدى الفرح كانت بمثابة ولاده جديدة ليا


ولاده جديدة فى كل حاجة اتعلمت هنا فى المنتدى ازاى الناس تحب بعض
اتعلمت ازاى اتعامل مع الاخرين لاقيت هنا فى المنتدى كل حاجة حلوة
عرفت حاجات مكنتش اعرفها معلومات عامة ....مواضيع روحية


شوفت كمان اد ايه هنا احنا كلنا عيلة واحدة مع بعض فى كل حاجة

مع بعض فى المناسبات المفرحة واكتر حاجة وقوف الناس مع بعض فى الاوقات الحزينة

اللى بتيقى مستنى اى حد يطبطب عليك فيها فتلاقى كل عيلتك هنا فى منتدى الفرح ايديهم


بتسندك وبتطبطب عليك ...حقيقى المكان كله فرح ومحبة وسلام

كمان انا شوفت هنا احلى معاملة من الادارة وده طبعا قبل ما اكون واحده منهم

ومن اول يوم دخلت فيه هنا كانت الناس بتعاملنى بحب


وخصوصا معاملة طيبة جدا من رامز صاحب احلى واجمل منتدى على مستوى العالم

اد ايه هو انسان خلوق ومميز فى معاملته هنا للجميع

وطبعا اهم حاجة عدم تفرقته بين عضو والتانى وديه اهم حاجة بتميز اى ليدر او قائد

انه يكون انسان عادل وما يحاولش يظلم اى حد ...معلش انا طولت عليكم :):)


باختصار المنتدى قصة عشق عمرها ما هتنتهى بالنسبالى المنتدى هنا بيتى التانى

شكرا ليك يا رامز على اجمل واحلى منتدى منتدانا الغالى منتدى الفرح المسيحى

وميرسى جدا على مجهودك واحتمالك وسعة صدرك لينا ولكل واحد هنا فى اغلى منتىدى :):)

Rena Jesus 20 - 07 - 2018 07:28 PM

رد: قصة كفاح | نشأة منتدى الفرح المسيحى
 
بدايتى مع الفرح المسيحى


كانت عن طريق كلام مشرفة معانا هنا أسمها (ايرينى)
الحقيقة من كتر كلامها الحلو عن المنتدى والناس اللى هنا
شدتنى جداااا ... فى الاول مكنتش فاهمة يعنى اية منتدى ولا عارفة المفروض هتعامل ازاى
بس حبيت أدوق شوية من حلاوة المنتدى وأفرح زيها بالعيله الكبيرة اللى هنا


وفعلا سجلت فى المنتدى فى سبتمبر 2013
والحقيقة حسيت هنا أكتر بكتير من اللى حكتلى عنه ايرينى
فعلا لقيت المحبة اللى بين الناس هنا أكبر من انها تتوصف
لقيت انى لما ابقى لسه جديدة هنا ومش عارفة حد والناس كلها أحتوتنى وبتسأل عليا
لقيت لما أغيب يوم وارجع ألقى رسايل كتير ... فينك .. مفتقدينك .. مش بتدخلى ليه
لقيت لما أفرح كل الناس بتفرح معايا ... ويتعملى رسايل تهنئة
لقيت لما أكون تعبانة ولا عندى مشكلة ناس بتسأل عنى وبتصليلى من قلبها
لقيت انى لما بدأت أنزل مواضيع الناس بتشجعنى .. حلو ده .. وحلوة الفكرة دى .. أستمرى فى الموضوع ده

الحقيقة انا لقيت هنا أكتر بكتير من اللى كنت متخيلاه
أتلقيت فعلا بيتى التانى ...

يارب منتدانا الغالى يفضل كده دايمااااا
بيقدم فرح وحب وتشجيع لكل الناس
يفضل كده دايما فى تقدم ونجاح
يفضل كده دايما بيخدم الكبير والصغير
ويفرح الحزين ويأخد بأيد المكسور لغاية ما يقف من تانى
يفضل كده دايما بيخدم كل الناس ويلقوة فية كل اللى هما محتاجينه

حابة فعلا أشكر مستر رامز على انه كان هو السبب فى وجود مكان زى الفرح المسيحى
بشكرك فعلا على مجهودك فيه .. بشكرك انك بتهتم وبتشجع كل الناس اللى هنا
بشكرك انك بتفرح بمشاركة الاعضاء حتى لو كان بسيطة وبتفتقدهم لما يغيبوا
ربنا يبارك خدمتك ويفرحك دايما

حابة كمان أشكر مارى .. سما ... ولاء
انا فعلا لقيت فيكم أخواتى .. لقيت فيكم محبة عجيبة فعلا ما شوفتهاش مع حد تانى
وللأمانه انا ما استهلش المحبة دى كلها
ربنا يخليكوا ليا ويفرح قلوبكم دايما

حابة اشكر اللى معايا ف الاشراف العام والمشرفين وكل الاعضاء
ربنا يبارك تعبكم ويعوضكم خير عن خدمتكم وتعبكم فى المنتدى

حابة أقول كلمة أخيرة ...
أنا بحبكم جدااااا ويارب يبقى عندى الفرصة انى أكون معاكم دايما
وياريت تسامحونى على تقصيرى فى خدمتى

ميرو 21 - 07 - 2018 12:33 AM

رد: قصة كفاح | نشأة منتدى الفرح المسيحى
 
بدايتي مع الفرع المسيحي :)

عرفت المنتدي من اختي (شيري2)
كنت بقعد عندنا لما بتفتحة اول حاجة عجبتني في منظرة الجميل وقد اية لونة حلوووو ونظامة شد انتباهي اوووي
سجلت في يوم 10/6/2012
وبدأت قصة الحب العجيب لية
فرحانة اوي بالمنتدي عشان في كل حاجة ممكن اكون عايزاها وحاجات تانية كتير بلاقيها قدامي بتفيدني كتير
ورسالة ربنا ليا اللي بتفرحني وطمني لباقي اليوم
وحظي اليوم اللي بديني تشجيع وفرحة كبيرة من ربنا
وشفيع اليوم اللي بيحرسني بصلواتة وبتشفع بية
وكتيييير من الحاجات الحلوة دي اللي فيها كمية رسائل من بابا يسوع ليا
بيكلمنا كتير بابا يسوع من خلال منتدي الفرح المسيحي
بحب اوووي المحبة اللي بينا
وبحب حب الاعضاء لبعض
وبحب اوووي اننا تفرح لفرح غيرنا ونزعل لزعلة بنشارك كل تفاصيل حياتنا هنااا
اعياد الميلاد لكل واحد فينا بنحتفل بيها يمكن مرينا كتير اننا في عيد ميلادناا الكل ناسي ومحدش فاكر بس هنا مافيش حاجة بتتنسي الكل بيدور يسعد غيرة ويكون اول واحد يعملة تهنئة من كل قلبة
الضحك والهزار والمقالب احم احم كل دة لية طعم تاني في الفرح المسيحي فقط جربتة قبل كدا في المنتديات التانية ولا يجي حاجة من عائلتي هنا
الافتقاد الجميل اللي بيحصل للغائب الفرحة برجوعة كلها مشاعر فرح
مش حابة اطول عليكم بس بجد انا فاشلة اني اوصفة كويس بالنسبالي اية

خااالص الشكر ل الكبير رامز بجد انت بتتعب اوووي ربنا يعوضك أضعاف أضعاف تعبك
وكل من ساهم في موضوع كومنت فرحة من أجل الغير شكرااا وربنا يفرح كل القلوب
انا بجد فرحانة اني معاكم وهفضل علي قلبكم برضة :) دة بيتي
وانا بحبكم كتيييييييير اوووووووي

MenA M.G 22 - 07 - 2018 08:02 PM

رد: قصة كفاح | نشأة منتدى الفرح المسيحى
 
بسم الثالوث القدوس ، حكايتى مع الفرح
---------------------------------------------

فى 2009 دخلت عالم المنتديات بسبب عدم استطاعتى فى انشاء حساب على اى موقع من مواقع التواصل الاجتماعى

وبالفعل سجلت فى أحد المنتديات المسيحية (غير موجود وتم حذفه ) ووجدت سهولة فى التعايش مع التعامل مع كيان وطبيعة المنتديات ، وبدأت فى التدرج الخدمى حتى أن أصبحت أخدم فى ادارة الموقع / ولكن نظراً لسنى الصغير فى هذا الوقت ، لم أُكن فعال بشكل كافى ، وحاولت جاهداً أنا أعود بالنجاح الى أدراجه وأرشد النهوض الى الموقع من جديد ولكن دون جدوى ، حيث أن المنظومة بالكامل فى الموقع كانت تعانى عناءً شديد ، وللأسف تملك اليأس من الادارة وتم اغلاق النشر فى المنتدى ومن ثمة حذفه نهائياً

قمت بإنشاء العديد من المنتديات المجانية ، ولكن واجهتنى صعوبات كثيرة فى الادارة حيث لغات البرمجة التى لم أكن أعرفها بعد ، وصعوبة وجود فريق ادارة لبداية الخدمة ، كل هذا كان كافى جداً لإحباطى .

وتوقفت عن اى نشاط يخص الانترنت حتى 2014 تقريباً

فى عام 2014 وبينما أنا أبحث عن موقع ينفُث الحياة فى رفات حبى للمنتديات ، بعث الله لى ما هو أكثر بكثير جداً مما طلبته ، حيث وجدت منتدى الفرح المسيحى ، وفى لمحة وجدت نفسى أقوم بالتسجيل داخل المنتدى وأتسلم رسالة ترحيب فى غاية الروعة ، واهتمام من مجموعة جميلة جداً لم أجد فى مثيله أبداً .

أيام وراسلت أستاذ رامز (مدير المنتدى) برغبتى فى الخدمة وانى على خبرة بالخدمة بالمنتدياات نظراً لانى كنت أخدم فى أحد فى المنتديات سابقاً ، وعلى الفور تم قبولى فرداً فى أسرة كبيرة وعلى مستوى عالى من المهنية والخبرة .

فى تلك الفترة كنت أواجه الكثير من الاختلاف فى سياسات المنتديان حيث طريقة الخدمة والتعامل
وكان هذا سلاح ذو حدين
1/ فضلت كثيراً سياسة المنتدى فى التعامل مع المواضيع والاعضاء والادارة والتازر بين كل عناصر المنتدى
2/ تعثرت كثيراً ولم أتقبل بعض النصائح ذلك لحداثتى فى الاحترافية ومنتدى الفرح المسيحى فى غاية الاحترافية وفى ذلك الوقت كنت مبتدئ جداً


فتغيبت عن المنتدى فترة سنتين حتى 2016 ولكن لم أستطع الصمود كثيراً عندما توفرت عندى أمكانيات التكنولوجيا التى تُمكنى من التعايش فى هذا المجتمع الالكترونى الاحترافى

فى عام 2016 دخلت المنتدى مرة أخرى تحت عضوية جديدة بثوب جديد قابل للتشكل بإحترافية ، وأيضاً قُبلتُ بإحترام شديد من أسرة المنتدى ، ومد يد العون فى الكثير من الأوقات

ولم أطلب فى هذه المرة الخدمة وإنما بعد مرور فترة وجد فيها الخدام أنى أصبحت قادر على الخدمة ـ تحدث معى أستاذ رامز وبكل حيادية طلب منى أختيار القسم المناسب وقد كان واختارت قسم توبيكات الفرح المسيحى وكانت تجربتى مع القسم مصدراً للفخر والعزة لى فى كل وقت

ومن ثم تعددت خدمتى فى أقسام أخرى حسب طلبى وهذا إن دل على شئ فإنه يدل أن القائمين على المنتدى يحترمون الخدمة وهى فى المرتبة الأولى لسياسة المنتدى

وجائتنى فى هذه الفترة عدة أفكار على سبيل المثال وليس الحصر ( قناة يوتيوب - صفحة تروجية على الفيسبوك - freelance - ) ولكن كانت كلها محاولات باءت بالفشل للأسف ، ولكن فى كل مرة أجد باب المنتدى مفتوح دوماً على مصرعيه يرحب بالكل .

استمرت خدمتى فى الفرح المسيحى حتى تسلمت خدمة الاشراف العام ومازلت أتعثر فى مواقف كثيرة وإنما يكون رد الفعل يدهشنى جداً من الادارة حيث أنهم مازالوا يواصولون الاحترافية عن طريق تقديم المساعدة والعون وماقشة الافكار الجديدة بحيادية وتفاهم شديد .

أتمنى من رب المجد أن يحفظ هذا الموقع وهذه الخدمة من ضربات العدو ومحاربات عدو الخير .


هتقع ← وقعت ؟ ← قوم ← ومهما كانت الهموم عندك رب كبير

اوفا 23 - 07 - 2018 06:04 PM

رد: قصة كفاح | نشأة منتدى الفرح المسيحى
 
احم احم انا جيت اولا وحشتونى وبعتذر ع عدم السؤال زى الأول بس انتوا قلبكم كبير وهتعدوها هههههههه
بدايتى مع المنتدى كانت انى دخلت اكتر من منتدى علشان اجمع مواضيع وفقرات للخدمة عندى وكان من ضمن المنتديات الفرح المسيحى عرفتنى عليه مارينا اختى وسجلت فيه بعد فترة كانت ف 9 /2012 وتعرفت ع احلى اخوات اهتمام ومحبة وثقة ملقتهاش غير هنا للامانة وكمان اول حد يعملى عيد ميلاد كان هنا ولما ببقى تعبانة الكل بيسأل عليا ودى حاجة بجد بتفرحنى جداااا وحببتى مارى بتشيل شغلى لما اغيب وسما بتهون عليا كتير وولاء ومستر رامز والكل بمحبتهم الحلوه يارب دابما ف نجاح ومحبة للمنتدى ولينا كلنا

souad jaalouk 23 - 07 - 2018 09:15 PM

رد: قصة كفاح | نشأة منتدى الفرح المسيحى
 
مسا الخير والسعادة

بمسيكون بالخير أخوتي الأفاضل وأخواتي الفاضلات

أنا قصتي مع الفرح المسيحيّ بلشت السنة الماضية وبالتحديد بنيسان 2017 وحبيت كون من ضمن الأعضاء وخادمة بهالمنتدى المبارك ..
فتشت عليه وقبل كنت ادخل كزايرة وأخرج لأنو كنت بمنتديين وكنت بالإدارة العامة أدخل وفلفش بأقسامو وشي بداخلي يقلي ليش ما بتكوني من خادماتو
اتسجلت وانطرت ... يوم ... يومين ... تلاته ... وطال الانتظار وكل يوم ادخل ولاقي اسمي موجود بس ما فيي شارك بشي ابدااا
طولت بالي قلت يمكن عم يتحروا عني لاني على المام بسياسة المنتديات شوي ...
مرق شهر والتاني ... وما في شي وارسلت كذا رسالة للمنتدى دون جواب
وانا شي بداخلي عم يقلي ما تيأسي وفجأة خطرت ببالي فكرة ونفذتها فوراااا

أختي ولاء فاروق
ما كنت بعرفها ولا هيي صديقة عندي بس كنت شوف اسمها بالمنتدى وقلت الحل عندها أكيد ..
بعتلها رسالة ع الخاص بالاحرى اتطفلت عليها وشرحتلها الوضع كلو
وكان الرد من ولاء بالقبول وتفعيل اسمي بالمنتدى بسرعة ولقيت الترحيب من الكل أخوة وأخوات بحق وحقيقة وهيدا الشي كان بحزيران 2017 ومن وقتها وانا ضمن كوكبة من الأخوة على قد ما احكي وفيض بالحكي بضل مقصرة بحقهون كتير
بشكر الجميع على تشجيعون الكبير الي

استاذ رامز كان الايد اللي رستني لبر الامان
أختي ولاء الفضل الكبير الها
اختي ماري وسما واوفا ورينا ومارينا الكل الكل استاذ مرقس شاعرنا الرقيق
وخينا مينا اللي خصني بصفحة شعريّة مثبتة وسماني الشاعرة وانا عن جد وبكل فخر وجودي بيناتكون نعمة من الله
بطلب من الله وامنا مريم العدرا نضل مجموعين بهالمنادى المبارك اللي هوي بيتنا التاني وكنيستنا المباركة ودايمااا يا رب للمزيد من التألق والإبداع

virgen mary 24 - 07 - 2018 06:10 AM

رد: قصة كفاح | نشأة منتدى الفرح المسيحى
 
منتدانا الغالى جداااا عليا
قصه مع المنتدى ابتدت مع حظك اليوم كنت بصلى قبل ما اقرا الايه وكل يوم كانت بتبقى حقيقى ماشيه مع الموقف اللى بمر بيه وسنين مرت وكل يوم اول حاجه لازم اعملها اشوف وعد ربنا ليا وتعزيته .وكمان خدت بركه انى امسك قسم اقوال اباء بس للاسف الظروف بعدتنى وقصرت فى الخدمه.بس المنتدى كان سبب بركه كبيره فى حياتى وكمان دلوقتي بعد ما عملت الفيس بنزل الايه وبقت سبب بركه لناس كتيرلدرجه انى مش حابه الفيس بس ناس كتير قالولى معلش الايه بتفرق كتير. كنت حابه بس اعرف طريقه ازاى انزل الايه بشعار للمنتدى نفسي الناس كلها تعرفه.كمان الصراحه والمواضيع الهامه اللى بيطرحها المنتدى محتاجين نعرف كل حاجه من مصدر موثوق منه وراى الكنيسه والانجيل بدل ما نعرف الحاجه من مصادر خاطئه.
كلام كتير ومشاعر جوايا للمنتدى ربنا يبارك الخدمه وكل من له تعب وتكون مثمره اكثر واكثر.

Haia 25 - 07 - 2018 04:45 AM

رد: قصة كفاح | نشأة منتدى الفرح المسيحى
 
يسعد صباحكم جميعاّ
يرجع وجودى فى المنتدى إلى الأخت والصديقة العزيزة جدا إلى قلبى مارى نعيم
والحقيقة المنتدى له تقدير خاص عندى لان عطائه وافر جدا على مستوى الخدمة والمعلومات , وايضاّ على مستوى الاخوة والاخوات .
كثير من الذكريات وكثير من الصداقات الرائعة . دائما به الجديد ودائماّ يبحث عن التحديث .
شكر خاص لكل أخ ولكل أخت بالمنتدى .
ربنا يديم المحبة ويجعله بأستمرار رسالة فرح للجميع

بنتك يايسوع 25 - 07 - 2018 07:21 PM

رد: قصة كفاح | نشأة منتدى الفرح المسيحى
 
بدايتي مع الفرح المسيحي
انا بدأت فى عالم المنتديات من مارس 2010

كنت موجوده ف منتدى بحبه جدا جدا وكان لسه جديد

فكنت دايما بدور على مواضيع جديده اقدر اضيفها هناك
ودايما كان اول منتدى يظهرلى الفرح المسيحي ولما لاحظت التكرار
و يوم 15/10/2010 قلت اسجل بقي عشان يبقي سهل عليا الاقى المنتدى

فعلا سجلت ومكنتش بعمل حاجه غير انى انقل مواضيع واخرج
بس استغربت جدا لما لاقيت انى رغم عدم مشاركتي ف المنتدى وبرغم ان ماليش اى علاقه باى حد هنا

الا انى كنت بدخل الاقى رسايل ليا من اللى موجودين هنا وخصوصا سما ومارى وكان مارينا كمان وقتها
كانوا دايما بيسالوا ويطمنوا عليا بالرغم من انى معرفهمش

وكنت بشوف هزارهم وروحهم الحلوه شدونى جدا بمحبتهم لبعض وللمنتدى
وبدأت اشارك فعلا ف المنتدى حتى لو قليل بس كنت حابه جدا اشاركهم

وبدات اتعلق بالمنتدى وبالرغم ان اكتر من منتدى كان ليا فيهم صلاحيات كامله الا انى كنت بحس بالحريه اكتر هنا وحبيت المنتدى جداا ولما وقع السيرفر بتاع المنتدى حسيت انى فقدت حاجه كبيره و غاليه عليا قوىشفت صرح كبير وحاجه عظيمه بتتهد قدامى بس فرحت لما لاقيت اننا كلنا هدفنا نقوم المنتدى من تانى وفعلا بنعمة ربنا رجع اكبر من الاول كمان

يمكن مقصره جدااااا ف حق المنتدى و الخدمه الا ان عمر حد هنا ما حسسني بكده

ودايما بيحسسونى ان ليا دور ف المنتدى
هنا بالنسبالى مش مجرد منتدى هنا بيتي والمكان اللى برتاح فيه

المكان اللى لاقيت فيه الحب والاخوه و الصداقه و الخدمه اللى بدون مقابل

حنان بنت المسيح 27 - 07 - 2018 11:49 AM

رد: قصة كفاح | نشأة منتدى الفرح المسيحى
 
بدايتى كنت مشتركه فى منتدى تانى وشفت اعلان منتدى الفرح المسيحى فى المنتدى اللى كنت مشتركه فيه وعجبنى شكله وسجلت فيه ومن يوم ما سجلت فيه وانا شايفه اهتمام الكل بيا زى ما يكون المنتدى ما فيهوش غيرى حبيت المنتدى جدا لانى شفت انه مش مجرد مواضيع بتتكتب وخلاص زى اى منتدى لا لقيت فيه حجات تانيه جميله جدا غير اى منتدى تانى وبرغم انى لظروفى مشاركاتى قليله جدا لكن برضه الاهتمام والافتقاد مش بيقله بجد المنتدى جميل جدا ربنا يبارك الخدمه وكل القائمين عليها
ويبعد عن المنتدى عدو الخير ويكون ديما رساله فرح للجميع

مورا مرمر 29 - 07 - 2018 07:15 PM

رد: قصة كفاح | نشأة منتدى الفرح المسيحى
 
بداية معرفتى بمنتدى الفرح المسيحى كانت من خلال صفحة حظك اليوم على الفيس ولما ضغطت على رابط المنتدى كزائر وجدت اقسام رائعة جدا وكنت مصممة اشترك فى المنتدى فى الاجازة لانى كنت بتابع حظك اليوم اثناء الدراسة والرسائل الاخرى المفرحة كانت بتفرق معايا وتشجعنى دايما واسم المنتدى المتميز شجعنى ان احاول الانضمام معكم وثم دخلت على المنتدى فى تاريخ 25 - 05 - 2015

وجدت فى البداية ترحيب جامد من الادمنز ثم من باقى الاعضاء وتشجيع كبير منهم على ان اشارك بالموضوعات
ووجدت ان الترابط والحب هو ما يجمع اعضاء منتدانا الغالى فبمختلف الاعمار والخبرات بينهم الا اننا نشعر جميعا بالاخوة والحب كنت وما زلت اشعر انكم عائلتى واخواتى .


بدأت بالمشاركة والتفاعل معكم ووجدت على كل موضوعاتى ومشاركاتى الاهتمام والتشجيع .

اشكركم جميعا على مجهودكم الرائع وتشجيعكم الدائم للجميع واتمنى الاستمرار فى ذلك ،صدركم الرحب ومحبتكم للجميع هى التى جعلت منكم ولمنتدانا متميز بهذا التميز الفريد .

اعتذر عن تقصيرى معكم سواء فى السؤال عليكم او فى خدمتى معكم ..لكنى اعدكم باننى سأحاول ان اشارك معكم مرة اخرى .

منتدى الفرح المسيحى منتدى متميز جدا .. يتميز بالانطلاق فى كافة المجالات عن باقى المنتدايات ..
اتمنى الاستمرار فى التميز ..وتقديم خدمتكم الرائعة والمثمرة


نرمين واصف 03 - 08 - 2018 02:32 PM

رد: قصة كفاح | نشأة منتدى الفرح المسيحى
 
الفرح المسيحي
قد وجدني ولم أبحث عنه ....في يوم بكتب فرح وجدت اسم المنتدى امامي دخلته وشعرت بأنني انتمي لهذا المكان
.....في صعوباتي اجد رسالة الرب علي فم اخوتي
...وفي ضيقاتي اجد تطابق المواضيع مع حالتي
...وفي فرحي أجد سماء الفرح تفرح مع فرحتي
...وفي سؤالي للرب شيئا أجد الإجابة من خلال مواضيع اولاد الملك
هذا المنتدي بالرغم اني مقصرة في المواضيع وفي الدخول لضيق الوقت والظروف الا اني لابد ادخل واستقي من انهار الماء الحي من باطن اولاد الملك يسوع المسيح
واخيرا اشكر كل من راي المنتدي وتخيله وأصبح حقيقة بنعمة المسيح
اشكر الرب في أعضاء المحبة المفرحين المنتدبين في هذا الموقع لتوصيل رسالة المسيح
واخيرا وليس آخرا بل بداية اطلبوا من اجلي فاذكروني في صلواتكم كما كنت اجد صلواتكم من قبل من اجلي أن يجعلني الرب حسب رؤيته التي يرتئيها من اجلي وان يحقق الرب حسب مشيئته ما ارتئيه حسب رؤية الرب يسوع من اجلي
ولكم التحية والمحبة ففي قصة المنتدي معي في سنين مضت وشهور كما تمر الايام تمر معها قصص واقعية ومقصوصات في حياتي شاركني فيها قلب المنتدي الذي ينبض حب وفرح
وان قصصت قصص لم انتهي
اشكر الرب يسوع من اجلكم دائما
الرب يبارك كل عمل لمجد اسمه امين

marmora elamora 18 - 08 - 2018 02:32 PM

رد: قصة كفاح | نشأة منتدى الفرح المسيحى
 
بدايتى مع الفرح المسيحى ♥
أولاً كده وحشتونى جدااا ووحشنى المنتدى اوووى واسفه على التأخير
اتعرفت على المنتدى لما كنت بحب ادور على قصائد او فقرات حلوة
حبيت المنتدى جدا وسجلت فيه علشان اتابع براحتى بقى واشارك مش ابقى زائرة بس
فرحت اوووى لما مستر رامز بعتلى يقولى انه عايزنى اكون مشرفة فى وقتها حسيت انى ليا دور مهم فى المكان ده
الفرح المسيحى بقى بيتى بقى لازم ادخل كل يوم
اجمل اخوات واصحاب عرفتهم هنا ♥
مبسوطة كتيييير انى فى المكان ده
ربنا يبارك خدمة منتدنا وبيتنا التانى ويبارك تعب مستر رامز

حبو اعدائكم 26 - 08 - 2018 08:24 AM

رد: قصة كفاح | نشأة منتدى الفرح المسيحى
 
متابعه الموضوع الجميل دا --
اشكر استاذ رامز طبعا انه عمل الموضوع دا... لان دى كانت من اوائل الحجات الى دورت عليها هنا
انى اعرف قصه نشاه المنتدى دا و كانت لسى مش موجوده--

قريت كل مداخلاتكم مداخله مداخله -- اشكركم
و فى انتظار مشاركه باقى الاخوات الجمال

بنت معلم الاجيال 27 - 08 - 2018 09:22 PM

رد: قصة كفاح | نشأة منتدى الفرح المسيحى
 
بدايتى مع الفرح المسيحى
كانت في شهر 5 سنة 2012
و العضوية كانت قديمة قوووي
لكن قبل ما اكون عضوة كان ليا علاقة بالموقع عن طريق البحث في جوجل و لقيت كذا مرة كل ما ابحث عن حاجة الاقية ظهر لي في جوجل
كنت بتفرج علية من بعيد ل بعيد
لحد سنة الماجستير و من هنا سجلت لان الكلمة اللي دفعتني للتسجيل في الموقع
هي خناقة بيني انا و دكتور اشرف المشرف علي الرسالة الخناقة دية كان سببها موضوع الرسالة هو للعلم بس انا دكتورة نفسية و كان وقت الماجستير لازم اخصص جهة معينة للدراسة ففي منا بيكون متخصص في امراض نفسية ناتجة عن امراض جنسية و انا رفضت الموضوع و قلت لة انا تخصص ذوي قدرات خاصة و حابة اعمل حاجة يا صم و بكم او مكفوفين و هو كمان رفض و فضلنا نتخانق سوي وفي الاخر قالي يا بنتي ما انتم ليكم موقع اسمة الفرح المسيحي فية القسم دة و انا نفسي بتعلم منة الكلام دة مش عيب يا دكتورة الثقافة اتغيرت
طبعا انا فاهمة ان الثقافة اتغيرت بس انا مش قابلة الموضوع و من هنا جالي الفضول اني لازم ادخل الفرح المسيحي دة اشوف اية الموقع دة و افهم و بالفعل دخلت و سجلت و فتحت اقسام كتير من الموقع الا القسم دة هههههههههههههههه
و كنت داخلة وقتها جديدة معرفش حد نهائي في الموقع
بدانا واحدة واحدة يسالوا عليا و اسال عليهم و نقرب من بعض و نتبادل كل الحب الاخوي بكل تقدير و احترام و حتي الان احنا مش بنسيب بعض قريبين من بعض و مهتمين ببعض و تقريبا كلنا بقينا اسرة واحدة بالرغم من اجراااااامي
ههههههههههههههههه
انا كمان لما حصل عندي ظروف مكنتش بدخل كان فعلا وحشني الموقع و الناس قوي بس كنا علي تواصل بالواتس لحين ما ربنا اراد بس فعلا الفترة دية كانت فارقة في حياتي قوي لان حسيت ان في حاجة مهمة نقصتني في يومي نظرا لظروف خارجة عن ارادتي بس قبل الظروف دية انا تقريبا لحد الفجر مكنتش بسيب الموقع
باختصار مؤقت
الموقع دة باهلة وناسة و اقسامة وكل حاجة هو كل حاجة في حياتي
اخواتي و اصحابي و فرحي وضحكي و هزاري و جدي و كمان اجرامي
ههههههههههههههههه
كنت بلاقي متعتي هنا و مازلت كنت فرحانة دايما و دة بجد بيتي بيتي بيتي اللي برتاح فية و بفرح فية
و برضوا بصبح مجرمة فية
هههههههههههههههههههههه
صعب جدا الكلام عن بيت اصبح هو نبض قلبك بس دة حاجة مؤقتة
و فاصل و ساعود و لا في حد عندة اعتراض ولا حاجة
يبقي لو لية شوق في حاجة يحققها لنفسة و يدعي بالرحمة
ههههههههههههههههههه
مع تحيات ريا مرعبة الاعضاء اللي كل حاجة معاكم وحشاني قوووووووووووووي
فاصل و نواصل

marit jesus 28 - 08 - 2018 09:51 AM

رد: قصة كفاح | نشأة منتدى الفرح المسيحى
 
اولا قبل اى حاجة وقبل ماحكى قصتى الجميلة فى المنتدى
اولا بعتذر منكم كتير على غيابى الطويل وتقصيرى فى خدمتى بس انتوا اكيد عارفين انكم غالين اوى عندى وبجد انا اسفة جدا بسبب هذا التقصير بسبب ظروف خارجة عن الارادة غصب عنى سامحونى

اولا تعرفت على المنتدى عن طريق اختى مورا مرمر وسالتها عنه وشكرت لى فى جامد جدا وانا فى الاول مكنتش بحب المنتديات ولا ليا طول بال انى اقعد على المنتدى فقولت وماله اجرب مش هخسر حاجة وفعلا دخلت وسجلت وطبعا لقيت ترحيب جامد من استاذ رامز وحبايب قلبى سما ومارى فى الاول مكنتش عارفة حاجة وكنت بجرب وادخل واقرا فى الاقسام المختلفة لحد مابقيت معاكم

فانا مديونة للمنتدى بحاجات كتير اوووووووووووى حلوة حصلتلى بسبب وجوده فى حياتى من ضمنها واهمها انى بدات انشر اشعارى وكتاباتى ومن ثمة هنا بدات تبقى ابداعات وروائع بكم وبتشجيعكم لاول موضوع اتكتب بعنون ابحث عنك فكان اول انطلاقة ليا فكنت بكتب من قبله مواضيع ولكن كنت لا انشرها فمن هنا تشجعت بكم وهذا الفضل يرجع اليكم والى ادراة المنتدى اللتى كانت مرحبة للغاية بجميع الكتابات حتى الان واشكر كل الخدام وعلى راسهم شاعرنا الفاضل استاذى المبجل استاذ مرقس الذى دائما يشجع الكتابات والاشعار بكلاماته الرقيقة المشجعة التى وكانها الماء الذى يروى النبات
فكلم لكم جزيل الشكر فانتم بجد سبب نجاحى

فالمنتدى هو بيتى الكبير لما بتكون حاجة مضايقنى بفتح التوبيكات او الرسالة اليومية وحظك ويغير المود خالص

فهالمنتدى العيلة الكبيرة اللى بتبارك واللى بتفتقد واللى بتعزى وتواسى وبتحتفل باعياد القديسين فالمنتدى على الحلوة وعلى المرة على الفرح وعلى الضيق ففعلا اسم على مسمى فهو بيرجع الضحكة الغايبة من خلال النكت والفرفشة وباقي الاقسام بتحيى الامال والاحلام

فبجد مهما قولت وحكيت عن المنتدى مش هيوفيه حقه فالكم جميعا ايها الاخوة الاحباء لكل واحد منكم له نشاط كبير ويعتبر اساس هذا الصرح فبوجودكم لم يكون هذا الكيان الرائع ولا من غيركم لم اكون اناااااا فالكم خالص الشكر والامتنان لكم

Mina Robil 02 - 09 - 2018 07:17 PM

رد: قصة كفاح | نشأة منتدى الفرح المسيحى
 
منتدى رائع وسعيد جدا انه مكمل بنعمة المسيح
انا اشتركت في المنتدى من 2010 تقريبا سعتها كانت الحادثة الشهيره لشهداء نجع حمادى وكنا تقريبا طول اليوم فاتحين ومتابعين الاحداث اول بأول وكنا بنزل مواضيع كتيرر.. انا مبسوط انى عضويتى لسه موجوده وفاخور انى معاكم ربنا يكمل خدمتكم ويباركها


الساعة الآن 11:07 AM

Powered by vBulletin® Copyright ©2000 - 2021