منتدى الفرح المسيحى - حاسب من الوجع الاخرس

https://upload.chjoy.com/uploads/162672772560871.jpg

فيه واحد لما بيزعل بيشيل وجعه جوه ضلوعه و يكتمه ، و الأسباب كتير قوي ..

ممكن لانه حساس جدا ، و مش عاوز يتقل علي حد و يشيل همه ..

و ممكن لانه جرب يشكي لحد و ما سمعهوش، أو سمعه و ما اهتمش و لا ادي الموضوع حجمه، أو سمعه و استهان بوجعه و اتريق عليه ..

ممكن كمان لأنه دور علي حد يسمعه و ما لقيش، أو لقيه مشغول و مش فاضيله، و فاضي لناس اهم و مواضيع اهم !

علشان كده شال وجعه جواه و كتمه، و قال لنفسه الشكوي لغير الله مذلة ..

الوجع الاخرس موت بالبطيء، دبح بسكينة تلمة ، نار قايدة ما بتهداش..

قلبي مع كل قلب مجروح و لسانه مشلول ..

احكي وجعك ، بس اختار اللي تحكي له .. لو لقيته مش فاضي أو مش مهتم اوعي تسكت ، عاتبه و لو ما سمعش سيبه ، و روح دور علي حد تاني فاهمك و مقدر المك و بيحترم وجعك ، و ح تلاقي حد و لو بعد حين ..

لكن لو ما لقيتش اوعي تسكت ، عليّ صوتك لربنا سامع الصلاة و فضفض له ؛ مرات ما بنلاقيش غيره فاضي يحس بينا و يسمعنا و يقدر مشاعرنا المكلومة ، و يطبطب علينا و يطيب خاطرنا..

صديقي المحبوب ، حاسب من الوجع الاخرس..