قواعد أزمة الدولار من ناحيـة الوظائف تحديداً - :

Rena Jesus · رقم المشاركة : ( 1 ) 05 - 11 - 2016, 12:11 PM

قواعد أزمة الدولار من ناحيـة الوظائف تحديداً - :

1 - جهز نفسك لموجة غلاء متوقعة .. استعد و Brace for Impact لتلقي تغييرات ممكن تكون كبيرة على مستوى نمط حياتك العادية .

2- حاول تستوعب أن الـ 10 جنيه ملهاش قيمة ، مقارنة بـ 10 سنوات مضت مثلاً .. دا شيء طبيعي ، قبل حتى التعويم .. ضبطّ نفسك على الوضع الجديد ..

3 - قلل تواصلك الإجتماعي مع الناس بشكل كبير الفترة المقبلة تحديداً ، لأن الإحباط هيكون الأساس ، والطاقة السلبية في كل مكان..

4 - استجمع شتات نفسـك ، و Get Your Shit Together وابدأ في التفكيـر بشكل صحيح بخصوص الفترة المقبلة ، بناءً على الحقائق مهما كانت مؤلمة..

5- فرصة ممتازة انك تبدأ تشتغل على نفسك وتطوّرها .. استغل مناخ الأزمة في انك تقلل مستوى ( العلـو*** ) في دمك لأدنى مستوياتها على الإطلاق في تاريخ حياتك كلها .. وارفع مستوى الـ ( Stamina ) لأعلى مستوياته على الإطـلاق في تاريخ حياتك كلها..

6 - اعمل Destroying لمصاريفك الكمالية كلها ( السجائر ، البيبسي ، الشيشة ، إلخ )

7 - لو بدين ، فدا الوقت المناسب لعمل الدايت .. تسترجع صحّتك ، وتقلل مصاريفك في نفس الوقت ..

8 - استهدف العمــل بوظيفـة تدرّ عليك دخل بالدولار ، مش بالجنيه ..

9 - ابدأ شغلك كمستقـل عبر الإنترنت ..

** ملحوظة :

العمل كمستقل Freelancer ، بيفتح بيوت ومردوده جيد جداً ..

متخليش حد يضحك عليك ويقنعك انه ( تسويق شبكي ) أو ( نصب آخر ) .. العمل المستقل هو أساس الوظائف في العالم كله حالياً .

10 - لما تبدأ كفـريلانسر ، نصيحتي في البداية انك تركز على انك تتعلم Social Media Management و SEO و Digital Marketing ..
هم أساس العمـل المستقل على الويب حالياً ، ولها مردود مادي ممتاز ، مهما كانت المؤسسات صغيرة أو متوسطة. والأهم ، تقدر تبدأ فيها سريعاً ، بعكس البرمجة والتصميم اللى محتاجة شوية وقت.

11 - لو طالب في مدرسة أو جامعة ، اتعلم Skill واشتغل عليها فوراً عشان تـ Get on Stage في زمن قياسي ، وتبدأ شغلك.. مفيش وقت اقسم بالله ..

12 - لو انت ( موهوب ) في أي شيء ، استغله بأي طريقة .. لو موهوب في الرسم ، بيع رسومـاتك على مواقع الخدمات المصغّــرة زي موقع خمسات .. تكرار المبيعات هيكون له مردود ممتاز عليك..

13 - لو عندك خبـرة في أي شيء – مهما كان - ، اعمـل كورس ، وبيعه على خمسـات بمبلغ كويس ، أو يوديمي .. المهم انك تستغل الخبـرة دي في درّ ربح ، حتى لو خبرة في فن التطريز ..

14 - اتعلم من تجارب الدول المحيطة .. العملة انهارت في سوريا – مثلاً – من 50 ليرة أمام الدولار ، الى 500 ليرة .. اسألهم عايشين ازاى ، وهما هيجاوبوك ..

15 - سجّــل في كل مواقع العمــل الحر .. موقع مستقل .. نبّش .. بيكاليكا .. خمسات .. لينكيد إن .. خللي عندك موطئ قدم في كل منافذ ( العمل المستقل ) على الانترنت ..

16 - بشكل عام ، استهدف كل وسائل الربح الاليكتروني .. اعمل قنـاة جادة على Youtube تربح منها بالتدريج .. اعمـل موقع كامل بنفسك ونزّل عليه محتوى ، واربح من اعلاناتها ..

الموضوع هياخد شوية وقت لحد ما موقعك ، أو قنـاتك تزدهر وتعود عليك بعائد جيد .. اعتبره استثمـار بعيد المدى .. أفضل مليون مرة من قعدات الفيسبوك

17- العمل المستقل هو أساس كل شيء .. محتاج وصلة نت + لغة كويسة + Skill عظيمة ..

18 - لو بتشتغل في وظيفة ، وقررت تتركها – لأي سبب - .. أجّـل القرار ، ولو فترة بسيطة لحد ما تعرف ما هو قادم الفترة المقبلة.

19 - لو بتشتغل في وظيفة ، وانت كارهها ، ومديرك قارفك في عيشتك ، ومفيش بديل .. حاول تفتح معاه صفحة جديدة ، تكون الحياة أكثر لطفاً بينكم ..

20 - لو هتبدأ Start Up ، ركّز بشكل كاسح على الاستفادة من الكسـاد الاقتصادي اللى عايشين فيه .. انك تبدأ موقع توظيف مميز ، أو بيع وشراء منتجات أساسية بأسعار مخفّضة ، إلخ ..

21 - اتفرج على أفلام الكسـاد الإقتصادي اللى حصل في العالم وقت الازمة المالية .. رغم ان المشكلة مختلفة تماماً ، لكن عيش حالة الأزمة نفسها ، وفكّــر زيهم : The Big shorts ، The company men ، money never sleeps ، إلخ ..

22 - قلل تحرّكاتك وتنقلاتك .. كل شيء ينفع يتعمل عن طريق الانترنت ، اعمله عن طريق الانترنت أو الخدمات الأونلاين ..

23 - هاجِـــر / سافـر ، بمجرّد ما تلوح الفرصة ..

24 - ابدأ مشروع صغيّـر ، ولكن بحذر .. مترميش أي جنيه الا وانت دارس مردوده جيداً ..

25 - كل يوم يمر عليك ، اتعلم معلومة / skill / طريقة بحث .. تدخلها في حيّز التطبيق اللى يعود عليك بمردود مالي ولو بعد حين ..

أخيراً .. إيّــاك تتذلل لأي أحد تحت أي ظرف ، أو تتملّق للآخرين ..

ربّك هو الرزّاق في الأول والآخر .. لا تسمح لمخلوق انه يحاول يقلل من كرامتك ، أو يساومك لأنك محتاج أو في أزمة مالية ..

طالما بتتحرك ، وبتوجد بدائل طول الوقت ، وبتتعلم طول الوقت ، وبتنمّي مهاراتك وبتدخلها في حيّز التطبيق بسرعة ، ربّك هيبعتلك الفرص بنفس مقدار جهدك في السعي وراها ..

أزمة وهتعدّي .. ربنا يرزقنا جميعاً ..