|
 |
 |
 |
|
رقم المشاركة : ( 1 )
13 - 09 - 2016, 08:29 AM
|
|||||||||||
|
|||||||||||
 _ افتحى يا ماما .. افتحى .. _ ايه يا سلمى مالك .. بتعيطى ليه كدة .. وايه الشنطة اللى فى ايدك دى _ ضربنى يا ماما .. ضربنى بالقلم على وشى .. _ ضربك؟ .. وانتى سكتى له؟ انا هالبس ورايحة له .. _ رايحة له فين .. كفاية بقى انتى السبب يا ماما .. انتى السبب ضربنى بسببك بصت لها .. _ انا السبب؟ _ ايوة .. انتى اللى خليتيه يعمل فيا كدة من صدمتها قعدت على اقرب كرسى ولسة هتتكلم .. قاطعتها بنتها .. _ ماصدقناهوش لما قال ان كل ده هيحصل .. ياريتك كنتى سمعتى كلامه .. _ هـ .. هو مين؟ _ بابا يا ماما .. بابا وقعدت على الكرسى اللى قدامها وكأنها شايفة قدامها فيلم بتحكيه .. _ لما كنت باسمعكم بتزعقوا سوا .. كنت باستغرب دايما من كلمة بيقولهالك .. اعملى حساب لما بنتك تتجوز .. فى كل مرة كنتى بترفعى صوتك عليه .. الاقيه يثور ويقولك اهانتى مش هاسكت عليها كتير ويوم ما غلطتى فيه .. وشوفته بيمد ايده عليكى ماكنتش عارفة ازعل عشانك .. ولا افرح عشان هو خد حقه .. _ كفاية ماتكمليش يا سلمى .. _ لأ هاكمل .. هاكمل عشان خاطره اليوم اللى دخلت عليكم فيه .. ولقيته بيبوس رجلك بيترجاكى .. انك تخلى البيت يعيش فى هدوء عشان خاطرنا خلانى اسأل جوايا ليه كدة يا بابا .. انت اقوى من كدة ماكنتش عارفة ان تربيتنا صح .. هى نقطة ضعفه فى حياته كنت باستغرب انه بيعمل كل حاجة لنفسه فى البيت رغم ان ده دورك .. اتاريه كان بيفضّى وقتك عشان تهتمى بتربيتنا ومايجيش يوم تقولى له طلباتك هى السبب بس اهو عاش يحارب لوحده عشان قضية خسرانه كنت باستغرب من كلامك عليه .. دايما اتهامات انه مشغول عن البيت .. وكأنك عايزة تقنعينى بحاجة مش موجودة امال مين اللى كان بيذاكرلى .. ومين كان بيتفنن يعمل لنا اكلات مختلفة .. اقولك على كلمة فى سرك .. لما كانت بتيجى سيرتك وانا هو لوحدنا .. كان بيقول ماما طيبة .. بس محتاجة تفهم شوية حاجات .. رغم ان لما سيرته كانت تيجى بينى وبينك .. كنتى تقولى لى .. شايفة ابوكى وعمايله .. هنا قاطعتها بحدّة .. _ انتى جاية تحاسبينى بعد كل السنين دى .. بعد ما استحملت وربيتك .. وخليـتك فى احسـ ... _ اوعى تكملى وتقولى احسن حال .. كل اللى انا فيه ده بابا ياما قالهولك .. ان تصرفاتك هتتطبع جوايا غصب عنى .. صوتك العالى .. وعصبيتك لما بابا يقولك لأ على حاجة ... زعيقك فيه وغلطك .. تجاهلك ليه وانك تسيبيه وتمشى وهو بيتكلم محايلته عليكى انك بس تحترمى اسلوبك معاه .. خوفه عليا من كل مشكلة .. _ كويس انك اعترفتى انه كان بيقول لى لأ .. _ وايه يعنى .. ياما طلع معاه حق .. وانا سمعتك مرة بتقولى له .. انت بتبقى شايف لقدام .. وانا بابقى باصة تحت رجليا .. ليه ماكنتيش كدة معاه علطول .. اكيد كان حالنا اتغير .. عارفة يا ماما .. من يوم ما عرفت انى حامل وانا خايفة .. ياترى هابقى ام زيك .. ولا هاعرف اتغير .. وفضل الخوف والقلق يزيد جوايا .. _ بقى كدة يا سلمى !.. ماما بقت حاجة مش عايزة تبقى زيها ؟ .. بعد كل اللى عملته عشانك .. عشان يبقى ليكى قيمة قدام جوزك .. _ انتى فاكرة ان انتى كدة عملتى لى قيمة ؟ .. تحبى تعرفى اللى حصل بينى وبين ايمن .. بعد ما رجعت من الشغل دخلت اجهز الغدا .. رجع هو بعديا بساعة .. كنت خلصت .. دخل من برة متضايق وتعبان من الشغل .. ودخل نام علطول .. وانا كنت تعبانة من الحمل .. مادريتش بنفسى غير وانا بازعق فيه .. وباتعصب عليه .. وغصب عنى قلت له .. روح عند مامتك نام هناك .. وغلطت فيه كتير .. لقيته قام ضربنى بالقلم وقاللى .. صحيح .. مانتى عيشتى تسمعى الكلام ده علطول فى البيت .. ساعتها انهارت من العياط .. عارفة ليه مش عشان ضربنى .. عشان افتكرت كلام بابا ليكى .. "يوم ما بنتك تيجيلك غلطانة .. جبروتك وعصبيتك مش هيرجعولها حقها" _ وانتى مين قالك انى هاسيب حقك .. انتى تخليكى هنا فى بيت ابوكى .. وانا اجيب لك حقـ .. _ بيت مين يا ماما؟ .. ابوكى؟ هو فين بابا يا ماما .. دلوقتى بتقولى بيت ابوكى .. البيت اللى بابا سابه .. عشان ماكانش قادر .. على عدم الاحترام اكتر من كدة .. انا مش عايزة حقى اللى هيخلينى اربى ولادى فى بيت زى اللى انا اتربيت فيه .. سابتها ودخلت اوضتها .. قعدت على سريرها منهارة مش عارفة تفكر .. بصت على كرسى مكتبها .. وكأنها بتشوف مشهد من سنين .. بابا انا زهقت من زعيقك انت وماما .. سلمى حبيبتى انتى كبرتى .. مش مهم حجم المشاكل اللى بتشوفيها .. المهم لازم تعرفى فين الصح من الغلط .. لازم تعرفى الحق .. رنت الكلمة فى ودنها كأنها بتسمعها فعلاً .. ايوة صح .. لازم اعرف الحق قامت غسلت وشها .. وهى خارجة .. مامتها كانت جايبة لها حاجة تشربها .. _ ايوة صح لازم اعرف الحق .. _ رايحة فين يا سلمى .. انا عملت لك العصير اللى بتحبيه .. مارديتش عليها .. _ ايوة صح لازم اعرف الحق .. نزلت جرى راحت له .. فضلت تخبط بجنون وهى بتعيط .. _ افتح يا بابا .. انا سلمى اول ما فتح وشافها بتعيط .. خدها فى حضنه .. _ وحشتينى يا حبيبتى .. مالك فيكى ايه؟ خدها وقعد بيها وهى مرمية على كتفه .. _ بابا .. انا فهمت دلوقتى كل اللى قلتهولى زمان .. فهمت دلوقتى يعنى ايه بيت واحترام .. بس يا خسارة .. بعد ما كل حاجة راحت انا زعقت فى ايمن وغلطت فيه جامد .. وهو اتنرفز عليا وضربنى بالقلم .. وخلانى لميت هدومى ورحت عند ماما .. وانت قلت لى لازم اعرف الحق .. عرّفنى بقى ارجوك .. ساعتها دموعه نزلت .. هو ده اللى عشت طول عمرى عامل حسابه .. وكنت خايف من اليوم ده .. فضل يهدّى فيها لغاية ما ارتاحت .. قال لها طب ادخلى نامى ولما تصحى نتكلم .. شوية ودخل صحاها . _ بقولك ايه ماتيجى نخرج نغير جو .. قومى جهزى نفسك .. غسلت وشها وغيرت هدومها .. ونزلوا سوا .. وهما فى العربية .. _ بابا انت هتودينى فين .. _ هاوديكى مكان هتنبسطى فيه خالص .. دخلوا جنينة سوا .. سابها وقام يجيب حاجة يشربوها .. وهى قاعدة .. لقت ايدين بتغمى عينيها .. _ هههههه انت لسة فاكر يا بابا .. مسكت ايديه .. _ ايه دا انت مش بابا .. قلبها فضل يدق جامد .. والبيبى بيتحرك جواها من فرحتها .. وبقت دموعها تنزل من تحت ايديه .. لف وبص لها .. ولسة ايديه على وشها .. وهو بيمسح دموعها .. لسة هتتكلم .. _ انا اســـ ... _ ششششششش مش عايزك تقولى ولا حاجة .. انا عارف انه كان غصب عنك .. وعارف انى ماكانش المفروض امد ايدى عليكى .. _ لا .. انت كان لازم تعمل كدة .. عشان افوق لنفسى .. واشيل من جوايا كل ذكرى سودا ممكن تدمر حياتنا .. اخدها فى حضنه .. وانا واثق انك هتقدرى .. جه باباها .. _ايه يا سى ايمن .. بقى اسيب البنت نص ساعة .. اجى الاقيك واخدها فى حضنك فى مكان عام ؟ هههههههه ها يا سلمى .. لسة عايزة تعرفى فين الحق .. الحق انك تحبى جوزك .. طالما انتى اخترتيه ومقتنعة باختيارك .. الحق انك تعالجى فى بيتك .. كل تقصير شوفتيه فى بيت ابوكى الحق انك تفهمى .. ان كرامتك من كرامته الحق انك تعرفى .. ان امانك فى بيتك طالما جوزك بيعرف ربنا الحق انك تسترى عليه .. عشان انتى مالكيش ستر غيره _عارف يا بابا الحق فين كمان؟ _ فين يا حبيبتى .. _ الحق فى كل كلمة قلتهالى وانا حفرتها جوايا الحق انا عشته فى كلمة .. بابا _ طب ياللا قومى خدى جوزك وروحوا بيتكم .. على فكرة .. انا سميتك سلمى .. عشان كنت بادعى ربنا طول عمرى .. انه يسلمك من كل اللى بيحصل فى البيت .. والحمد لله .. انهاردة اتأكدت انه استجاب لى .. سلمى رجعت بيتها .. عشان تلغى .. كل حاجة وحشة عاشتها وشافتها فى بيت باباها .. سلمى قدرت تكتشف الغلط فين .. وفضلت تدوّر على الحق .. متهيألى بيوت كتير ممكن تتغير دلوقتى .. لو اكتشفوا الغلط فين .. ولو عرفوا يلاقوا الحق .. والكلام ده حقيقى جدااا ... أمير تادرس 
|
|
13 - 09 - 2016, 09:10 AM
|
رقم المشاركة : ( 2 ) | ||||
|
..::| الإدارة العامة |::..
|
رد: سلمى ....هترجع
ميرسي على مشاركتك الجميلة
|
||||
|
|
|
13 - 09 - 2016, 02:06 PM
|
رقم المشاركة : ( 4 ) | ||||
|
..::| الاشراف العام |::..
|
رد: سلمى ....هترجع
ميرسى لمروركم الغالى
 |
||||
|
|
 |
|
| قد تكون مهتم بالمواضيع التالية ايضاً |
| الموضوع |
| هترجع تاني بيك افراحنا |
| هترجع تانى احسن مما كنت |
| إمتى هترجع البيت !!؟ |
| سلمى صباحي للمصريين بالخارج: «حمدين ناضل من أجلكم 40 سنة» دعت سلمى صباحي، نجلة المرشح الرئاسي حمدين |
| هترجع سجنها |
العرض العادي
