انتي حلمك لسه فيكي

[walaa farouk]

👈
لكل بنت أهلها خلوها تتمنى ف يوم من الايام إنها تكون ولد ، أو إنها تنام متصحاش ، أو تهرب بأي جوازة والسلام 😁

لكل بنت جوزها جه عليها بالقوي ودمّرلها احلام طفولتها البرئية وحولها لمسخ منه لما بصت لنفسها ف المراية ... اتفزعت 😳

لكل بنت حماها او حماتها كانوا سبب ف كسرتها وضعفها لأن كل جريمتها .. إنها قبلت بظروف ابنهم 👊

لكل بنت استاذها استغل طيبتها وبراءتها وانها بتحبه زي والدها ، وهو كان ليه أغراض تانية عقلها أصلا ميستوعبهاش 😓

لكل بنت طيبتها كانت سبب في ان كل اللي حواليها يستغلوها ويستهتروا حتى بوجعها عشان يشبعوا عقد نقص جواهم بأنهم مرغوب فيهم 😖

لكل بنت اضطرت انها تكون الراجل والست ، عشان فيه لطخ اتخدعت فيه وصدقت انه راجل هيحميها ويحافظ عليها 💔

لكل بنت حبت وأدت بالقوي ، وكان جزائها إنها اتوجعت واتخذلت من أقرب الناس لقلبها 😢

لكل بنت جوزها خانها واتهمها بأبشع الاتهامات عشان بس يبرر لنفسه إن هو مش غلط ، وإنها السبب ف كل شيئ 😔

لكل بنت فجأة لقت نفسها أم لطفل ولا اتنين متحملة كامل مسؤوليتهم واللي حواليها بيطالبوها أنها تتخلي عن كل شيئ ، ونسيوا إنها عيّلة عمرها حاجة وعشرين سنة ........🙈

**************************
👈صدقيني ..
انتي مش لوحدك ، بعيداااا عن ان فيه كتير قوي زيك ، بس اللي عملتيه مراحش هدر ، اوعى تصدقيهم وتنسي نفسك وتيجي عليها زي ماهما جم ، ربنا مطلّع على كل شيئ وشايفك وحاسس بيكي ، ابتلاكي عشان يختبر صبرك وقوتك ، وطالما ابتلاكي الابتلاء ده يبقى انتي قده ، ربنا عدل واستحالة يظلمك اوعي تستسلمي ، اوعي تصدقي إنهم أقوى منك ، لانهم أضعف مما تتخيلي استقووا عليكي بقوتك انتي ، استرديها من تاني واوعي تقبلي انك تعيشي اللي جاي زي ماعشتي اللي فات ، ربنا معاكى ، ربنا كريم وكبير وليه حكمة ف كل حاجة بتحصل ف حياتك وحياتنا ، لو مش قادرة لوحدك استعيني بحد يساعدك لكن متفضليش مكانك
حقك منهم هيرجعلك ، لكن حقك ف التقصير ف حق نفسك انتي المسئولة عنه وعمرك ما هتلاقي نفسك إلا لما ترجّعيه ✋

انتي حلمك لسه فيكي
اوعي ف يوم تودّعيه

[Mary Naeem]

انتي حلمك لسه فيكي
اوعي ف يوم تودّعيه

صح يا قمر

ربنا يباركك حببتي

[walaa farouk]

ميرسى على مرورك الغالى

[sama smsma]

حلووووووو يا لولو

[walaa farouk]

ميرسى على مرورك الغالى سمسمة