|
 |
 |
 |
|
رقم المشاركة : ( 1 )
20 - 08 - 2017, 09:55 PM
|
|||||||||||
|
|||||||||||
 سيبوني تحت الغطا شبعانة ودفيانة .. نايمة ومتغطية طفلة... وشايفة الدنيا وردية وعندي ابتسامة هأقابل بيها بكرة... معرفشي إيه جي... ومش هاممني بس عندي أسئلة... ملهاش اجابات... لكن مش مستعجلة...عايزة آخد وقتي... عشان أطلع سليمة ... مش مبهدلة! سيبوني تحت الغطا خلوني هنا في الدفا... ــــــــــــــــــــــــــــــــــــــــــــــــــ فجأة... جه حد شد الغطا... اتعريت... اتقرصت من البرد... صرخت... محدش رد عليَ محدش جه يغطيني محدش جه يطمني... أو حتى يفهمني صرخت تاني: إلحقيني يا ماما! قالوا: ماما إيه اللي بتناديها؟! إنتي فاكرة نفسك لسة عيلة؟! لأ مش عيلة... بس عندي أسئلة وعايزة ماما والدفا والأكل وعايزة بابا والشرح والكلام بالعقل... قالولي: خلاص... دلوقتي إنتي اللي هنا... ... لأ ... مش عايزة أكبر دلوقت إنتو فاكرين نفسكو مين؟ تشيلوا وتحطوا في البني آدمين؟! سيبوني تحت الغطا... خلوني هنا في الدفا... ــــــــــــــــــــــــــــــــــــــــــــــــــ هتسبقني الاسئلة... هاضطر أعرف حاجات كتير متأجلة... ليه أنا بنت؟ وليه هو ولد؟ يعني هو كان ولد من ساعة ما اتْوَلد؟ طب هو العيال أصلاً بييجوا منين؟ وليه الولاد بيعملوا pee pee وهما واقفين؟ محدش عايز يقوللي ليه... هو ربنا شكله إيه؟ طب هو قاعد فين؟ مرة قالولي: في السما... جدو مشي ومش جي تاني عشان راح السما... بس جدو قفلوا عليه صندوق خشب... فِضِلتْ متحيرة... هي السما يعني في الصندوق الخشب؟ قالولي مانتي لسة صغيرة... سيبوني صغيرة... سيبوني تحت الغطا... خلوني هنا في الدفا... ــــــــــــــــــــــــــــــــــــــــــــــــــ أكبر؟! يعني إيه أكبر؟ من جوايا ولا من برايا؟ شكلي هيتغيَّر خالص ويطلعلي صدر قدامي وهانش ورايا ودم ووجع كل شهر ليه كل دة يفضل باقي عمري معايا؟! سيبوني تحت الغطا... خلوني هنا في الدفا... ــــــــــــــــــــــــــــــــــــــــــــــــــ حاجات عادية هتبقى عيب وممنوع ولما أسأل: ليه؟... يقولوا: أهو كدة... من غير سبب... صوتي ولبسي وشكلي... ولو بكلم ولد... عداد للوقت والضحك بيتحسب وكل دة لأحسن يتقال عليَ... بنت قليلة الأدب! سيبوني تحت الغطا... خلوني هنا في الدفا... ــــــــــــــــــــــــــــــــــــــــــــــــــ عايزة أفضل صغيْرة ومدَّارية عشان لما أنكل يسلم عليَ... ويطبطب على كتفي... وياخد ويدِّي... أقول وماله... ما هو زي والدي! بس دلوقتي... ممكن تحصل حاجات مش مريحة... أو لمسات مش بسيطة... غضبت... صرخت... زعقوا فيَّ: بس يا بت... جتك خيبة... دانتي طلعتي عبيطة! سيبوني تحت الغطا... خلوني هنا في الدفا... ــــــــــــــــــــــــــــــــــــــــــــــــــ هاتقرص... وأتوجع... لو حبيت وماتحبتش... لو حلمت ومحصلش... لو اديت وملقتش... خايفة أتوجع... ومستحملش يمكن أبكي تحت الغطا ومحدش دريان واحتمال مالاقيش حد يطبطب على ظهري... ويقوللي متخافيش... بكرة أحسن م اللي كان... سيبوني تحت الغطا... خلوني هنا في الدفا... ــــــــــــــــــــــــــــــــــــــــــــــــــ أنا مش هأكبر دلوقتي... بس ماتسيبونيش... مئاديفي متشلنيش... البحر عالي عليَ لوحدي دة أنا كدة هاخاف من نفسي هاخاف أحب وأشتهي وأكره وأغير.. هاحب واد أسمر حليوة... مفرود وسدره فيه شعر كتير! وهاغير لو كلم واحدة تانية... يمكن أغير من أي بنت كمان... لو أحلى مني... لو شعرها أطول من شعري... لو متأسمة عني..! أو مثلاً... لو حبت الواد اللي عاجبني..! يآآه... دة أنا هابقى وحشة أوي... ليه فتحتوا علىَ الفتحة ديَ؟ عايزة أفضل كدة مدَّارية... سيبوني تحت الغطا... خلوني هنا في الدفا... ــــــــــــــــــــــــــــــــــــــــــــــــــ حرام... كفاية... الرحمة يا ناس مش عايزة أتخض وأتلخبط وأحتاس أنا مش هاكبر بالعافية... هاتعلم وأتنور شوية شوية سيبوني أكبر على مهلي لاحْسَن أشيل كلاكيع أهلي هافهم وأتعور وأتداس لكني هاكبر... حتى لو دة التمن وبلاش تقلقوا عليَّ... بس ساعدوني... وإدوا فرصة للزمن أنا عارفة إن كل حاجة جاية يعني لا هاعيش طول عمري تحت الغطا... ولا هافضل قاعدة كدة في الدفا اللي أنا عارفاه ومتأكدة منه إن دلوقتي... مش وقتي... عشان كدة... سيبوني تحت الغطا... خلوني هنا في الدفا... 
|
|
21 - 08 - 2017, 10:19 AM
|
رقم المشاركة : ( 2 ) | ||||
|
† Admin Woman †
|
رد: سيبوني تحت الغطا
إن دلوقتي... مش وقتي...
عشان كدة... سيبوني تحت الغطا... خلوني هنا في الدفا... |
||||
|
|
|
21 - 08 - 2017, 10:39 PM
|
رقم المشاركة : ( 3 ) | ||||
|
..::| الإدارة العامة |::..
|
رد: سيبوني تحت الغطا
ميرسى على مرورك الغالى  |
||||
|
|
 |
|
| قد تكون مهتم بالمواضيع التالية ايضاً |
| الموضوع |
| نظرية الغطا |
| رشمت الصليب وقفلت الغطا |
| زوجة ممدوح عبد العليم تصرخ في المعزين «سيبوني» |
| سيبونى عليها ابططها |
| شكوى ضد العضوة فرونكا سيبونى أفضفض من قلبى |
العرض العادي
